ABŞ Konqresinin ikipartiyalı qətnaməsi Qubad İbadoğlunun dərhal azadlığa buraxılmasını tələb edir

ABŞ Konqresinin Nümayəndələr Palatasının 21 üzvü Azərbaycanı ötən ilin yayında Bakıda həbs edilmiş alim və iqtisadçı doktor Qubad İbadoğlunu dərhal azad etməyə çağıran qətnaməni (H.RES. 1012) imzalayıb.

Turan-ın Vaşinqton müxbirinin verdiyi xəbərə görə, qətnaməni fevralın 14-də Respublikaçılar Partiyasının üzvü Devid Rouzer təqdim edib, o Azərbaycan hökumətinin İbadoğluna münasibətini pisləyib və onun dərhal azadlığa buraxılmasına çağırıb.

Qətnaməyə əsasən, İbadoğlu və həyat yoldaşı 2023-cü il iyulun 23-də saxlanılaraq polis tərəfindən fiziki təzyiqlə üzləşiblər. O, əsassız olaraq çoxsaylı cinayət əməllərində ittiham olunur və Bakı həbsxanasında son dərəcə pis şəraitdə saxlanılır. Həbsindən sonra onun səhhəti xeyli pisləşməkdə davam edib və ona lazımi tibbi yardım göstərilmir.

“Doktor İbadoğlu dəfələrlə vəkillə görüşməkdən və ədalətli məhkəmə araşdırmasından məhrum edilib...   Dövlət Departamenti və ABŞ-ın Bakıdakı səfirliyi, eləcə də ABŞ-ın akademik qurumları və beynəlxalq ictimaiyyət təşkilatları doktor İbadoğlunun səhhəti ilə bağlı dərin narahatlıqlarını ifadə edib və onun dərhal azadlığa buraxılmasını tələb ediblər.   Doktor İbadoğlunun qanunsuz həbsi insan hüquqlarının və akademik azadlığın ciddi şəkildə pozulmasıdır”, - deyə qətnamədə bildirilir.

Müəlliflər Azərbaycanda qanunsuz həbs və azadlığın boğulması praktikasını pisləyir və doktor İbadoğlunun dərhal və qeyd-şərtsiz azad edilməsinə çağırırlar.

Qətnamədə həmçinin Dövlət katibini Azərbaycan hökuməti ilə danışıqlarda doktor İbadoğlunun səhhətini  və azadlığa buraxılmasını prioritet hesab etməyə çağırır.