Məhkəmə Qubad İbadoğlunun telefonlarının müsadirə olunması barədə şikayəti təmin etməyib

Bakının Nərimanov Rayon Məhkəməsi həbsdə olan müxalifətçi Qubad İbadoğlunun saxlanıldığı zaman ondan iki telefonun götürülməsi barədə şikayətini təmin etməyib.

Vəkil Zibeydə Sadıqova jurnalistlərə bildirib ki, saxlanılarkən İbadoğlundan iki şəxsi "Ayfon" götürülüb və onları hələ də qaytarmayıblar. Onun sözlərinə görə, istintaq telefonlara parolu tələb edib, lakin İbadoğlu onları verməyib.

Dekabrda KİV-də bu telefonlardakı foto və videodan istifadə edilməklə İbadoğlunun barəsində xoşagəlməz materiallar yayılıb.

Müdafiə tərəfi telefonların qanunsuz götürülməsi, mülkiyyət hüquqlarının pozulması və siyasətçinin şəxsi həyatına müdaxilə ilə bağlı məhkəməyə müraciət edib.

İclas zamanı istintaq nümayəndələri bildiriblər ki,  telefonlar "maddi sübut" kimi iş materiallarına əlavə olunub.

Müstəntiqlər bildiriblər ki, yalnız istintaq başa çatdıqdan sonra müdafiə tərəfi iş materialları ilə tanış ola bilər.