ABŞ Poltavaya raket hücumunu pisləyir

Çərşənbə axşamı ABŞ Rusiyanın Ukraynanın Poltava şəhərinə hücumunu qətiyyətlə pisləyib və daha çox hava hücumundan müdafiə sistemi verəcəyini vəd edib, Turan-ın Vaşinqton müxbiri bildirib. Hücum zamanı 51nəfər həlak olub.

"Bu faciəvi hücumu ən qətiyyətli şəkildə pisləyirəm", - prezident Co Bayden axşam öz bəyanatında bildirib. O, raket hücumunu "Putinin azad xalqın iradəsini qırmaq üçün davam etdirdiyi çirkin cəhdlərin faciəli xatırlatması" adlandırıb.

"Ancaq iki il yarım ərzində Ukrayna xalqı sarsılmaz dayandı və ABŞ hava hücumundan müdafiə sistemlərini və ölkəni qorumaq üçün imkanları təmin edərək onu dəstəkləməyə davam edəcək", - Bayden deyib

"Çaşqınlığa qapılmayın: Bu müharibədə Rusiya qalib gəlməyəcək. Ukrayna xalqı qalib gələcək. Bu faciəli gündə və hər gün ABŞ ukraynalıları dəstəkləyir", - o deyib.

Baydenin bəyanatının səsləndiyi vaxtda Ukrayna prezidenti Vladimir Zelenski bir daha Qərb müttəfiqlərini daha uzun mənzilli döyüş sursatları göndərməyə və onların Rusiya ərazisində tətbiqinə razılıq verməyə çağırıb.

"Ukraynaya bu silahların göndərilməsi və onların tətbiqinə razılıq verilməsi bu müharibənin real, ədalətli sona çatması üçün ən böyük addım olardı",- Zelenski bildirib.

Mayda ABŞ öz siyasətinə dəyişiklik edib ki, bu, Ukrayna komandirlərinə ABŞ silahlarından Rusiyaya atəş etməyə imkan verir, lakin məhdud məqsədlə - şimal-şərqdə Xarkov şəhərini qorumaq üçün.