ABŞ Qarabağa dair danışıqları bərpa etməyə can atır, Blinken Avropa və Türkiyəyə gedir

Vaşinqton, Kolumbiya dairəsi/15.02.23/Turan: Birləşmiş Ştatlar fikir ayrılıqlarının aradan qaldırılmasından ötrü yeni danışıqlar üçün yaxın günlərdə Azərbaycan və Ermənistan rəsmi şəxslərinin bir araya gətirilməsi məsələsini "öyrənir", - diplomatik mənbələr Turan-ın Vaşinqtondakı müxbirinə bildiriblər. Hələlik başqa detallar yoxdur, mənbə əlavə edib.

Çərşənbə günü ABŞ-ın yüksək vəzifəli diplomatı,  Avropa və Avrasiyadan məsul olan Karen Donfrid Azərbaycanın xarici işlər naziri Ceyhun Bayramovla həftə ərzində ikinci dəfə söhbət edib. Amerika tərəfdən söhbətin məzmunu təfərrüat yoxdur.

Bu addım onunla əlaqədardır ki, bu gün ABŞ dövlət katibi Entoni Blinken Münhen Təhlükəsizlik Konfransında iştirak etmək üçün Avropaya gedir. O, Ukraynaya gələcək dəstəyi, Türkiyə və Suriyaya yardımı müzakirə etmək üçün bir sıra ikitərəfli və çoxtərəfli görüşlərdə iştirak edəcək, Dövlət Departamentinin məlumatında deyilir.

Diplomatik mənbələrə görə, Münhen konfransında həm azərbaycanlı, həm də ermənistanlı yüksək vəzifəli diplomatlar, o cümlədən  Ermənistanın baş naziri Nikol Paşinyan iştirak edəcək.

Dövlət Departamentinin nümayəndələri Blinkenin Münhendə görüş proqramını açıqlamayıblar.

Blinken fevralın 6-da baş vermiş zəlzələlərin nəticələrinin aradan qaldırılmasında ABŞ-ın Türkiyə hakimiyyətinə yardım  səylərini öz gözləri ilə görmək, həmçinin NATO üzrə dəyərli müttəfiq kimi Türkiyə ilə tərəfdaşlığın daha da möhkəmləndirilməsi yollarını müzakirə etmək üçün fevralın 19-da Türkiyəyə səfər edəcək.

Blinkenin son dayanacağı Yunanıstan olacaq,  Afinada ölkə rəhbərliyilə strateji dialoq aparacaq.

Çərşənbə axşamı Ermənistanın xarici işlər naziri Ararat Mirzoyan son üç onillikdə ilk dəfə Ermənistan-Türkiyə sərhədinin qısa müddətə açılmasından sonra Türkiyəyə tarixi səfər edib. “30 il bağlı olan Ermənistan-Türkiyə sərhədinin Adıyamana gedən humanitar yardımın göndərilməsi üçün Ermənistanın yük maşınlarına açılmasını rəmzi hesab edirəm", - Mirzoyan türkiyəli həmkarı Çavuşoğlu ilə birgə keçirilən mətbuat konfransında deyib:

Turan-ın müxbiri Mirzoyanın Türkiyəyə səfəri və onun regionda sülh səylərinə təsirilə bağlı Dövlət Departamentinin nümayəndəsi Ned Praysın fikirlərini soruşub.

"Mən sözü iki hökumətə buraxıram. Bizim həm Ermənistana, həm Azərbaycana, həm də bütün regiona mesajımız ondan ibarətdir ki, prosesi hərtərəfli və möhkəm sülh yoluna qaytarmaq üçün gərginliyi azaltmağın yolunu tapmaq lazımdır", - Prays cavabında deyib.

"Biz bu səylərdə ikitərəfli və çoxtərəfli əsasda iştirak edirik və bu prosesi irəlilətmək üçün ABŞ əlindən gələni etməyə davam edəcək. Ümid edirik ki, digər ölkələr də eyni siqnalı göndərəcəklər, amma biz digər ölkələrin göndərdiyi siqnallara cavabdeh deyilik", - o  deyib.

Türkiyə və Suriyadakı fəlakətli zəlzələyə toxunan Prays deyib ki,  ABŞ Türkiyə və Suriya xalqlarına dəstək verən bütün ölkələri alqışlayır.

Prays Vaşinqton ABŞ hökumətinin Türkiyə və Suriyaya dəstək üçün 85 milyon dollar ayırdığını bildirib. Dövlət katibi Blinkenin Türkiyəyə səfəri zamanı ABŞ hökumətinin türkiyəli müttəfiqləri və Suriya xalqı üçün nə etdiyini və başqa nə edə biləcəyini görmək fürsəti əldə edəcək, Prays fikrini yekunlaşdırıb. 25B