ABŞ Qəzzədə humanitar fasilələr veriləcəyini bildirib

Vaşinqton/10.11.23/Turan: Cümə axşamı Bayden Administrasiyası ABŞ-ın İsraili müharibədən əziyyət çəkən mülki əhalini dəstəkləməyə razılaşdırmasından sonra Qəzzə bölgəsində fasilələr veriləcəyini bildirib, xəbəri Turan-ın Vaşinqtondakı müxbiri verib.

Milli Təhlükəsizlik Şurasının nümayəndəsi Con Kirbi bildirib ki, bir neçə dörd saatlıq fasilələr veriləcək və İsrail hər bir humanitar fasiləni üç saat əvvəl elan edəcək.

Bu fasilələr HƏMAS tərəfindən saxlanılan 240 girovun, o cümlədən amerikalıların azad edilməsini təmin etməyə kömək edə bilər: "Hesab edirik ki, bu fasilələr, xüsusən, mülki şəxslərin təhlükəsiz bölgələrə keçməsinə kömək etmək üçün doğru istiqamətdə atılan addımdır", deyə o bildirib.

Bu arada, cümə axşamı Bayden administrasiyasının yüksək vəzifəli nümayəndəsi bildirib ki, Qəzzə bölgəsində həlak olan fələstinlilərin sayı, çox güman ki, 10 min nəfəri aşıb. 

"Konkret rəqəm deyə bilmərəm, ola bilər ki, bu rəqəm açıqlanandan daha yüksək olsun", deyə dövlət katibinin Yaxın Şərq məsələləri üzrə köməkçisi Barbara Lif bildirib.

Turan-ın Dövlət Departamentinin həlak olanların sayı ilə bağlı qiymətləndirməsi haqqında sualına cavabda Vedant Patel Barbara Liflə razı olduğunu bildirib.

"Buna görə biz mülki əhali arasında tələfatı minimuma endirmək üçün şərait yaratmaq məqsədilə israilli tərəfdaşlarımızla sıx əlaqəli addımlar atırıq", deyə o qeyd edib. 0