ABŞ Rusiya hərbiçilərinin vəhşiliklərini pisləyir, Ukraynaya yardımı artırmağı vəd edir

Vaşinqton/28.04.22/Turan: ABŞ Rusiyanın terrorçuluğa sponsorluq edən dövlətlər siyahısına daxil edilməsi ehtimalını nəzərdən keçirir, bu barədə dövlət katibi Entoni Blinken çərşənbə günü Konqresdə çıxış edərkən bildirib, xəbəri Turan-ın Vaşinqtondakı müxbiri verib.

"Şübhə etmirəm ki... ruslar Ukrayna xalqına qarşı terror törədir. Məsələ bu qiymətləndirmələrin qanunvericiliyin tələblərinə uyğun olub-olmadığından əmin olmaqdadır", deyə Blinken bildirib.

Ukrayna prezidenti Vladimir Zelenski artıq Rusiyanın terrorçuluğa sponsorluq edən dövlətlər siyahısına salınması xahişi ilə Bayden Administrasiyasına müraciət edib.

Çərşənbə günü axşam BMT Təhlükəsizlik Şurasının iclasında çıxış edən ABŞ-ın xüsusi səfiri Bet Van Şaak bildirib ki, Vaşinqtonun rusların Donetsk vilayətində təslim olmağa çalışan ukraynalıları edam etdiyinə dair "etibarlı dəlilləri" var. 

"Bizdə Donetsk yaxınlığındakı Rusiya hərbi hissəsinin təslim olmaq istəyən Ukraynalıları əsir götürmədiyi, onları edam etdiyi barədə etibarlı məlumat var", deyə o bildirib.

Edamlar dinc sakinlərə hücumlar, uşaqların oğurlanması, işgəncə və zorlama da daxil olmaqla, digər cinayətlərlə birlikdə Rusiyanın ittiham olunduğu artan hərbi cinayətlər siyahısının bir hissəsidir.

Çərşənbə günü Vaşinqton həmçinin Rusiyadan iki Avropa ölkəsinə qaz ixracının dayandırılmasına reaksiya verib. Energetika naziri Cennifer Qranholm jurnalistlərə bildirib ki, Rusiyanın Ukraynaya qarşı müharibəsi dünyanın Rusiyadan neft və qaz idxalını dayandırmalı və başqa enerji formalarına keçməli olduğu barədə "car çəkir".

Bayden administrasiyası Rusiyanın enerji daşıyıcılarının ixracını silaha çevirəcəyi barədə çoxdan xəbərdarlıq etmişdi.

Bu gün Vaşinqton vaxtı ilə saat 10:45-də prezident Baydenin "ölkəsini və azadlığını Rusiyadan qoruyan ukraynalılara dəstək" nitqi ilə çıxış edəcəyi gözlənilir, Ağ Evin məlumatında belə deyilir.

Son həftələr ABŞ Ukraynaya hərbi yardımı artırıb, Ukrayna qüvvələrinə ağır silah göndərib. Ötən həftə Bayden Ukraynaya daha 800 milyon dollar yardım ayrıldığını və bu həftə Konqresdən əlavə yardım paketi istəyəcəyini elan edib.

Ukraynaya göndərilən avadanlıqlar "döyüş meydanına təsir göstərir", deyə Pentaqonun mətbuat katibi Con Kirbi çərşənbə günü jurnalistlərə bildirib. Texnika Donbas cəbhə xəttində - əsas döyüşlərin aparıldığı yerdə həlledici rol oynayır. -25B-