ABŞ Rusiyanın maraqları naminə demokratiyaya xələl gətirdiyinə görə gürcü oliqarx İvanişviliyə qarşı sanksiyalar tətbiq edib

Cümə günü Birləşmiş Ştatlar demokratiya xələl gətirdiyinə görə gürcü milyarder Bidzina İvanişviliyə - ölkənin faktiki liderinə qarşı sanksiyalar tətbiq edib. Sanksiyalar İvanişviliyə məxsus olan bütün Amerika aktivlərini dondurur, bu barədə cümə günü ABŞ Dövlət Departamentinin və Maliyyə Nazirliyinin nümayəndələri jurnalistlərə bildiriblər. Yeni tədbirlərlə İvanişviliyə məxsus olan qurumların iştirakı ilə həyata keçirilən tranzaksiyalar da dayandırılacaq. Xəbəri Turan-ın müxbiri verib. Dövlət katibi Entoni Blinken bildirib ki, İvanişvili və onun partiyası "Gürcüstanın Avroatlantik gələcəyinə mane olaraq" onu "Gürcüstan ərazisinin 20 faizindən çoxunu işğal altında saxlamaqda davam edən" Rusiya qarşısında müdafiəsiz qoyub.

"Biz İvanişvilinin rəhbərliyi altında "Gürcü arzusu"nun hərəkətlərini, o cümlədən Gürcüstan vətəndaşlarına - etirazçılara, media nümayəndələrinə, hüquq müdafiəçilərinə və müxalifətçilərə qarşı davam edən amansız repressiyaları qətiyyətlə pisləyirik", deyə Blinken bildirib.

Respublikaçıların və demokratların Konqresdəki liderləri bu addımları alqışlayıblar və Bayden administrasiyasını gürcü xalqını dəstəkləməkdə davam etməyə çağırıblar. Helsinki Komissiyasının rəhbəri Co Uilson etirazçı xalqa dəstək verən hazırkı prezident Salome Zurabişvilini "Gürcüstanda yeganə qanuni lider kimi" yanvarın 20-də prezident Donald Trampın andiçmə mərasiminə dəvət edib. "İvanişvili Amerikaya nifrət edir, Çini və İranı sevir. O, Gürcüstanın suverenliyini və demokratiyasını məhv etməyi planlaşdırır. Gürcüstanın indi azad və ədalətli seçkilərə ehtiyacı var", deyə konqresmen Uilson sosial mediada yazıb.