ABŞ seçkilərə müdaxiləyə görə Rusiya KİV-lərinə qarşı sanksiyalar tətbiq edib

Çərşənbə günü Bayden administrasiyası Rusiya hökumətinin ABŞ-da prezident seçkilərinə təsir etmək səylərinin qarşısının alınmasına yönəlmiş genişmiqyaslı tədbirləri açıqlayıb. Bu tədbirlərə iki Rusiya vətəndaşına qarşı cinayət ittihamları, onlarla fiziki və hüquqi şəxsə qarşı sanksiyalar və 32 internet domeninin ləğv edilməsi daxildir, xəbəri Turan-ın Vaşinqtondakı müxbiri verib.

Dövlət katibi Antoni Blinken bununla bağlı deyib ki, Moskva öz metodlarına sadiqdir - bunlar suveren ölkələrə qanunsuz və əsassız hücum, təqsirsiz insanların ədalətsiz həbsi, kiberhücumlar, xaricdə seçkilərə müdaxilə və Ukrayna ərazisində saxta seçkilərin keçirilməsidir.

Əvvəllər Russia Today kimi məşhur olan RT media qurumu mətbuat təşkilatı çərçivələrindən kənara çıxıb və kontent hazırlanıb amerikalılara göndərilməsi üçün özəl şirkətə pul ödəyir. Bu kontentin mahiyyəti Kremlin ABŞ-da seçkilərə təsir etmək və demokratiyaya xələl gətirmək məqsədi daşıyan mesajlarından ibarətdir. RT rəhbərliyinin bütün bunlarla bilavasitə əlaqəsi var, deyə Blinken qeyd edib.

Buna cavab olaraq, Bayden administrasiyası aşağıdakı tədbirləri görüb: 

- RT-nin iki Moskva meneceri - 31 yaşlı Konstantin Kalaşnikov və 27 yaşlı Yelena Afanasyeva kontent yaradılmasını və Amerika auditoriyasına təsir etmək məqsədilə ABŞ-da Rusiyayönümlü təbliğatı və dezinformasiyanı maliyyələşdirməkdə ittiham olunub; 

- Amerikalıların öz dövlət müəssisələrinə etimadını azaltmaq məqsədi daşıyan fəaliyyətlərinə görə iki təşkilata və RT-nin baş redaktoru Marqarita Simonyan da daxil olmaqla, 10 nəfərə qarşı sanksiyalar tətbiq edilib;

- Kremlyönlü KİV-lərin əməkdaşlarına viza verilməsi məhdudlaşdırılıb; 

- ABŞ-a qarşı "yalan hekayələrin gizlicə yayılması" üçün istifadə olunan 32 internet-domen bloklanıb;

- Russia Today və onun beş bölməsi (RIA Novosti, RT, TV-Novosti, Ruptly və Sputnik) öz personalı haqqında ABŞ hökumətinə məlumat verməlidir;

- Rusiyanın Russian Angry Hackers Did It (RaHDit) qrupu ilə əlaqəsi olan hakerlər haqqında məlumata görə 10 milyon dollar ölçüsündə mükafat elan edilib.

"Birləşmiş Ştatlar Kremlin sponsorluq etdiyi, bizim demokratik institutlarımıza xələl gətirməyə çalışan bu subyektləri ifşa etməkdə davam edəcək və onları buna görə məsuliyyətə cəlb edəcək", deyə Dövlət Departamentinin mətbuat katibi Metyu Miller brifinqdə bildirib.

Turan-ın müxbirinin Rusiyanın dezinformasiya səylərinin müstəsna olaraq ABŞ-a, ya onun müttəfiqlərinə də yönəldiyi haqqında sualına cavabda Miller belə deyib: "Biz Rusiya hökumətinin müttəfiqlərimizin demokratik institutlarına yönəlmiş hərəkətlərini görmüşük. Bu gün açıqladığımız konkret hərəkətlər Birləşmiş Ştatlara aiddir, lakin, əlbəttə ki, biz Rusiyanın digər ölkələrdə də seçkilərə müdaxilə etməyə çalışdığını çoxdan görmüşük", deyə o qeyd edib.