Sən demə, səfir iki aydır ki, Şuşaya getməyə hazırlaşırmış (yeniləndi)

“Mən bu gün Şuşada olmaqdan xoşbəxtəm”, - bu barədə ABŞ səfiri Mark Libby Cıdır düzündən mayın 6 da yayımladığı videomüraciətində bildirib.

“Biz iki aya yaxındır ki bu səfərə hazırlaşırdıq və mən şadam ki, bu səfər nəhayət ki baş tutdu… Qonaqpərvərliyinizə görə təşəkkür edirəm… Azərbaycanın bütün bölgələrinə səfərlərimi davam etdirməyi səbirsizliklə gözləyirəm”, - səfir Libby qeyd edib.

Diplomat onun və xanımın çox səmimi qarşılandığını vurğulayıb. “Qonaqpərvərliyinizə görə təşəkkür edirəm. Bu səfər və şəhərin öz gözlərimlə gördüyüm inkişafı məndə çox böyük təəssürat yaratdı.  Azərbaycanın bütün bölgələrinə səfərlərimi davam etdirməyi səbirsizliklə gözləyirəm.

Bu gün Şuşadan başqa, hökumət nümayəndələri ilə görüşmək və səfirliyin həyata keçirdiyi ingilis dili proqramlarında iştirak etmiş yerli müəllimlərlə görüşmək üçün Füzuliyə səfər edəcəyəm.

Nə qədər ki, Azərbaycanda bizimlə işləmək istəyən tərəfdaşlarımız var, ABŞ bu ölkənin iqtisadi inkişafı və insanlarının rifahının dəstəklənməsi üçün çalışmağa davam edəcək", - ABŞ diplomatı qeyd edib.

* * *

ABŞ səfiri Şuşaya gəlib

Mayın 6-da ABŞ-ın Azərbaycandakı səfiri Mark Libbi həyat yoldaşı ilə birlikdə Şuşa şəhərinə gəlib.

Səfirliyin məlumatında deyilir ki, səfir və həyat yoldaşı şəhərin görməli yerləri ilə tanış olublar.

Səfir Azərbaycanın dövlət məmurları və ingilis dili proqramında iştirak edən yerli təhsil işçiləri ilə görüşməyi planlaşdırır. 

Xatırladaq ki, ABŞ-ın əvvəlki səfiri Li Litsenberger "hələ vaxtı çatmadığına" eyham edərək, Şuşa şəhərinə getməkdən imtina etmişdi.

Ötən şənbə günü Mark Libbi Turan-ın Şuşaya niyə getmədiyi haqqında sualına cavabda "hələ hazır olmadığını" bildirmişdi.