ABŞ Tbilisini NATO sammitinə dəvət edir

Bazar ertəsi Birləşmiş Ştatlar Gürcüstanı digər ölkələrlə birlikdə NATO-nun Vaşinqtonda keçiriləcək tərəfdaşlıq tədbirlərində iştirak etməyə dəvət etdiyini bildirib.  

"Gürcüstan və bütün tərəfdaşlar tərəfdaşlıq tədbirlərində iştiraka dəvət olunublar", deyə dövlət katibinin Avropa və Avrasiya məsələləri üzrə köməkçisi Ceyms O'Brayen bazar ertəsi brifinqdə bildirib.

O'Brayen deyib ki, gürcü xalqı Aİ və NATO-ya inteqrasiya etmək istəyir, lakin ABŞ "Gürcü arzusu"nun azsaylı liderlərinin "qərarlarına və ritorikasına" görə əvvəlki kimi "çox narahatdır". 

Vaşinqton istəyir ki, Tbilisi rəsmiləri getdikləri yolun və Qərbə münasibətdə istifadə etdikləri ritorikanın "Gürcü vətəndaşlarının 80%-nin istəyi ilə bir araya sığmadığını" başa düşsünlər, deyə O'Brayen qeyd edib.

"Biz istəyirik ki, qərar qəbul edən siyasətçilər başa düşsünlər ki, onlar bu yolu davam etdirsələr Aİ-yə inteqrasiyanı və NATO ilə sıx əməkdaşlığı təhlükə altına salacaqlar", deyə o bildirib.

O, "xarici agentlər" haqqında qanunun, müxalif xadimlərə və vətəndaş cəmiyyətinə qarşı zorakılığın Qərb dəyərləri ilə bir araya sığmadığını deyib. 

Dövlət katibinin siyasi məsələlər üzrə müavini səfir Con Bass da bazar ertəsi Brüssel Mətbuat Mərkəzi tərəfindən təşkil olunmuş ayrıca telekonfrans zamanı bu fikri dəstəkləyib.

"Bütün cəmiyyətin ümidlərinin və arzularının bir nəfərin - Bidzina İvanişvilinin girovuna çevrildiyini görmək çox narahatedici və kədərlidir", deyə Bass qeyd edib.

O, Gürcüstanın nə vaxt NATO üzvü olacağı haqqında suala cavabda deyib ki, Tbilisi demokratik idarəetmənin təməl prinsiplərinə riayət etməlidir. "Təəssüf ki, biz bunu görmürük", deyə o qeyd edib.