ABŞ "Xarici agentlər haqqında" qanuna görə Gürcüstan liderlərini məsuliyyətə cəlb etməyə “tərəddüd etməyəcək”

Birləşmiş Ştatlar Gürcüstanda "Xarici agentlər haqqında" Rusiyapərəst qanunun qəbul edilməsindən narahatlığını təsdiqləyib və Gürcüstan hökumətinə qarşı tədbir görəcəklərini bildirib, Turan-ın Vaşinqton müxbiri məlumat verib.

"Biz bu qanunun Gürcüstanı demokratik kursdan uzaqlaşdıracağından və vətəndaş cəmiyyətini sıxışdıra biləcəyindən, birləşmə və ifadə azadlığını boğa biləcəyindən narahatıq. Bütün bunlar ABŞ və Gürcüstan münasibətlərini əsaslı şəkildə dəyişdirir", - Dövlət Departamentinin nümayəndəsi Metyu Miller bazar ertəsi brifinqdə Turan-ın müxbirinin suallarını cavablandırarkən bildirib.

Vaşinqton və Brüsseldəki rəsmi şəxslər Gürcüstan liderlərini bu qanunun qəbuluna görə məsuliyyətə cəlb etməklə hədələyiblər.

Miller xatırladıb ki, ABŞ Gürcüstanla münasibətlərinə yenidən baxmağa başlayıb. "Biz yeni sanksiya siyasətini elan etdik, fərdi sanksiyalar hələlik tətbiq edilməyib, ancaq açıq şəkildə bildirdik ki, tərəddüd etmədən bunları tətbiq edəcəyik", - o deyib.

Turan-ın “Dövlət katibi Blinken Şərqi Avropaya son səfəri zamanı Gürcüstandan niyə bəhs etməyib?” sualının cavabında Miller deyib: "Dövlət katibi bəyanat yayıb ki, Gürcüstanla bağlı siyasətimizə kompleks şəkildə yenidən baxılacaq. Bu, Gürcüstana verdiyimiz yardımın yüz milyonlarla dolar yardımı sual altına qoyur. O həmçinin vizaların məhdudlaşdırılmasına dair yeni siyasəti elan edib".

Ötən həftə Blinken elan edib ki, Gürcüstanda demokratik prosesləri və ya institutları pozan istənilən şəxs, eləcə də onun yaxın ailə üzvləri Amerika vizası almaq hüququndan məhrum edilə bilər.