“Abzas Media işi” üzrə məhkəmə prosesi başlayır

Dekabrın 17-də Bakı Ağır Cinayətlər Məhkəməsində “Abzas Media işi” üzrə prosesə başlanılacaq. Prosesə Rasim Sadıqov sədrlik edəcək.

Qeyd edək ki, 2019-cu ildə Sülh və Demokratiya İnstitutu Sadıqovu "sifarişli qərarlar" çıxaran hakimlər siyahısına daxil edib. Vaxtilə o, hüquq müdafiəçiləri Arif Yunus, Leyla Yunus, Azərbaycan Xalq Cəbhəsi Partiyasının üzvü Fuad əhmədli,  dini fəallar əbülfəz Bünyadov, Elxan İsgəndərovun barəsində hökm çıxarıb.

*2023-cü ilin noyabr – 2024-cü ilin yanvar aylarında “Abzas Media” rəhbərləri və əməkdaşları - Ülvi Həsənli, Sevinc Vaqifqızı, Məhəmməd Kekalov, Nərgiz Absalamova və Elnarə Qasımova, həmçinin araşdırmaçı jurnalist, Turan agentliyinin əməkdaşı Hafiz Babalı həbs edilib. Mayda iqtisadçı, "Azadlıq" radiosunun əməkdaşı Fərid Mehralızadə bu iş üzrə həbs edilib.

Əvvəlcə onları Cinayət Məcəlləsinin 206.3.2-ci maddəsilə (qabaqcadan əlbir olan bir qrup şəxs tərəfindən qaçaqmalçılıq) ittiham ediblər. Lakin avqustun 16-19-da ittihamlar sərtləşdirilib: Cinayət Məcəlləsinin 192.3.2 (külli miqdarda gəlir əldə etməklə qanunsuz sahibkarlıq); 193-1.3.1 və 193-1.3.2 (mütəşəkkil qrup tərəfindən cinayət gəlirlərinin leqallaşdırılması); 206.4 (mütəşəkkil qrup tərəfindən qaçaqmalçılıq); 320.1 və 320.2 (sənədlərin saxtalaşdırılması və saxta sənədlərdən istifadə) və 213.2.1 (qrup şəklində vergidən yayınma) maddələri.

Bu ittihamlar 12 ilə qədər həbs cəzasını nəzərdə tutur. Jurnalistlər bütün ittihamları rədd edərək bildirirlər ki,  hakimiyyətin ən yüksək eşelonlarında korrupsiya faktlarını araşdırdıqlarına görə təqib olunurlar. Hüquq müdafiəçiləri onları siyasi məhbuslar kimi tanıyıblar. Bir çox beynəlxalq jurnalist və hüquq-müdafiə təşkilatı dəfələrlə onların azad edilməsinə çağırıblar.