Aİ və Azərbaycan nəqliyyat sahəsində 6 layihə həyata keçirirlər

Bakı/13.06.19/Turan: Avropa İttifaqı bu ilin sonunadək Azərbaycanla "açıq səma" sazişinin imzalanacağına ümid edir. Bu barədə genişlənmə və qonşuluq siyasəti məsələləri üzrə komissar Yohannes Han iyunun 13-də Bakıda keçirilən biznes-forumda bildirib.

Son illər Azərbaycan və Aİ arasında əməkdaşlığın xeyli intensivləşdiyini qeyd edən Y.Han ümidvar olduğunu bildirib ki, bu il tərəflər "açıq səma" haqqında sazişi imzalayacaqlar.

Bu müqavilə Azərbaycanla Aİ ölkələri arasında aviaəlaqənin sadələşdirilməsinə xidmət edəcək. Tərəflər bir-birinin aviaşirkətlərinin uçuşlarına olan maneələri qarşılıqlı şəkildə aradan qaldıraçaqlar.

2016-cı ildə Azərbaycan ABŞ ilə belə saziş imzalayıb.

Forum zamanı Y.Han onu da bildirib ki, son 10 ildə Aİ Azərbaycana 207 mln. avro həcmində maliyyə yardımı göstərib. Həmin vəsait Azərbaycanda kiçik və orta biznesin inkişafına yönəlib və 11 min adamın rifahının yaxşılaşmasına xidmət edib.

Bundan əlavə, Azərbaycan və Aİ nəqliyyat sahəsində prioritetləri müəyyən ediblər. Belə ki, nəqliyyat sahəsində 6 layihənin reallaşmasına 2,6 mlrd. avro yönəldiləcək. Bu layihələr Azərbaycanın nəqliyyat imkanlarını genişləndirəcək, Y.Han deyib, ancaq konkret hansı layihələrin nəzərdə tutulduğunu dəqiqləşdirməyib. -06D-