Media-icmal 13.06.19

Ölkədə aqrar sahə infrastrukturunun inkişafı, "Azərbaycan Dəmir Yolları" QSC-nin Belarusdan vaqon alması, Azərbaycan futbolunun vəziyyəti ilə bağlı müzakirələr və s. məsələlər bugünkü (13 iyun, 2019-cu il) medianın aparıcı mövzularındandır.

Aqroparklar- aqrar sahənin inkişaf lokomotivi

"Azərbaycan" qəzeti ilin sonunadək daha 13 aqropark yaradılacaq" sərlövhəli məqalədə ölkədə aqrar sektorun inkişafını dəyərləndirir.

Müəllif deyir ki, aqrar sektorda da hərtərəfli islahatlar gedir, sahənin idarə olunması, kadr hazırlığı, fermerlərə maliyyə-texniki dəstək məsələsində mühüm dəyişikliklər baş verib: "Məqsəd kənd təsərrüfatında daha səmərəli üsullardan istifadə edərək məhsul istehsalını artırmaqla həm ölkənin ərzaq təhlükəsizliyinə, həm də məhsul ixracına nail olmaqdır", müəllif islahatın gözlənilən nəticəsini belə dəyərləndirir.

Müəllif fermerlərə edilən güzəştlərə də toxunaraq vurğulayır ki, fermerlər torpaq vergisi istisna olmaqla bütün vergilərdən azad ediliblər, istifadə etdikləri yanacaq və sürtkü yağlarına görə dövlət büdcəsindən subsidiya ödənilir, aqrar sahədə sahibkarlıqla məşğul olanlara güzəştli şərtlərlə gübrə, toxum, ağac tingləri və damazlıq heyvanlar satılır, yaranan fərq dövlət büdcəsindən ödənilir və s.

"Dövlətin əsas hədəfi kiçik və orta kəndli təsərrüfatlarına yardım etməkdir. Bu məqsədlə hər il dövlət büdcəsindən fermerlərə milyon manatlarla güzəştli kredit verilir. Dövlət güzəştli kreditlərlə fermerlərin maliyyə problemlərinin həllinə kömək edir ki, onlar yaradılan imkandan bəhrələnərək öz təsərrüfatlarını genişləndirsinlər" deyə müəllif bu sahədə dövlət prioritetini ön plana çıxarır.

Ölkədə aqroparklara böyük marağın olduğunu deyın müəllif belə müəssisələrin yaradılmasına dövlətin yardım etdiyini, dövlət vəsaiti hesabına infrastrukturun yaradıldığını, bu məqsədlə ümumilikdə büdcədən 219 milyon manat investisiya yatırıldığını vurğulayır: "İndiyədək investisiya dəyəri 469 milyon manatdan çox olan 17 aqroparkın yaradılmasına 111 milyon manat güzəştli kredit verilib. Bununla yanaşı, 15 aqropark üzrə dəyəri 564 milyon manat olan 25 layihəyə investisiya təşviqi sənədi verilib, cari ilin sonunadək daha 13 aqroparkın istifadəyə verilməsi nəzərdə tutulub. Ümumilikdə isə ölkə üzrə 45 aqroparkın yaradılması planlaşdırılıb. Bunlardan 28-i bitkiçilik, 17-si heyvandarlıq üzrə ixtisaslaşacaq. Sözügedən aqroparkların sahəsi 192 min hektardır".

Həmin təsərrüfatların yaradılması kənd təsərrüfatı məhsullarının istehsalını artırmaqla yanaşı, bölgələrdə on milyonlarla insanın işlə təmin olunmasına imkan verəcək.

Bu sahədə müəllif prezident İlham Əliyevin aqrar sektordakı nəticələri yüksək dəyərləndirdiyini deyir: "Əminəm ki, kənd təsərrüfatının sürətli inkişafı, subsidiyaların verilməsi, fermerlərin texnika ilə təchiz edilməsi, yanacağın, gübrənin güzəştli şərtlərlə verilməsi, kompleks tədbirlər, üstəgəl ciddi islahatlar yaxın gələcəkdə çox gözəl nəticələrə gətirib çıxaracaq. Artıq biz nəticələri görürük. İnsanların məşğulluğu artır, rifah halı yaxşılaşır, bütün ölkədə böyük infrastruktur layihələri icra edilir".

Azərbaycan futbolunun inkişaf "şəraitsizliyi"

"Modern.az"da isə "Rövnəq Abdullayev istefa versin? - deputatlar milli komandanın bərbad oyunundan danışdılar" sərlövhəli məqalə diqqəti çəkir.

Müəllif Azərbaycan milli yığma komandasının "Avro-2020"nin seçmə mərhələsində Xorvatiyaya, Macarıstana və Slovakiyaya məğlubiyyətlərini, ölkə futbolunun inkişafı perspektivini deputatlarla müzakirə edir.

Müəllif deyir ki, Azərbaycan milli yığma komandası "Avro-2020"nin seçmə mərhələsində Xorvatiyaya, Macarıstana və Slovakiyaya məğlub olub, sonuncu oyunda isə azərkeşlər məğlubiyyətə cavab olaraq AFFA rəhbərliyinə "istefa" şüarları səsləndiriblər.

Deputat Fazil Mustafa hesab edir ki, Azərbaycan futbolunun indiki şəraitdə dirçəlməsi mümkün deyil və bunun səbəblərini açıqlayır: "Bunu həyata keçirmək üçün ölkədə köklü, fərqli özəlləşdirmə, sahibkarlığın inkişafına ehtiyac var. İri sahibkarlığın idmana meyllənməsini stimullaşdırmaq olar. Vergilərdən azad edilən iri şirkətlərin bölgə komandalarını himayə etməsinə şərait yaradılmalıdır. Futbol tək idman deyil, həm də biznesdir. Qərb ölkələri peşəkar şəkildə yetişdirilən futbolçulardan milyardlarla dollar qazanır. Belə futbolçular yetişdirmək üçün küçə futbolu inkişaf etdirilməlidir", - F. Mustafa bunu "Modern.az"a açıqlmasında bildirir.

Deputata görə, futbol üzərindən bütün vergilər götürülməli, binaların həyətində idman meydançaları salınmalıdır, orta məktəblərdə xüsusilə, regionlardakı məktəblərdə sağlam, gümrah uşaq yetişdirmək üçün məktəblərin idman siyasəti düzgün qurulmayıb.

"Bu sahədə əlverişli sistem qurulmalıdır. Belə olmasa, hər il futbol rəhbərliyi dəyişsə də, effektiv nəticə verməyəcək. Xarici ölkələrdən dəvət edilən məşqçilər o zaman fayda verər ki, Azərbaycanda canlı çempionat olsun, rəqabət mühiti yaransın. İndiki halda pulu əcnəbilərə xərcləməyin heç bir mənası yoxdur", -F.Mustafa ölkədə idmanın, o cümlədən futbolun inkişaf perspektivi barədə belə bədbin mövqe ifadə edib.

Deputat Aqil Abbas isə "Modern.az"a deyib ki, ölkə futbolunu ayağa qaldırmağın yeganə yolu regionlarda futbolu dirçəltməkdən keçir, Azərbaycanda 8 futbol komandası var, bu isə çox aşağı göstəricidir, yığma komandanı formalaşdırmaq üçün yetərli deyil: "Azərbaycan regionlarında futbol məktəbləri yoxdur. Gəncə, Tovuz, Lənkəran, Ağdam və digər bölgələr futbolçu yetişdirib, Azərbaycan futboluna verə bilmirsə, hansı inkişafdan danışa bilərik?

A.Abbas hesab edir ki, indiki halda AFFA rəhbərliyi dəyişsə belə, Azərbaycan futbolu bu şəraitdə inkişaf edə bilməyəcək.

"Elə bir düz danışan "dəmir yolları"dır ...

"Yeni Sabah.az"da isə "Adamlar xəcalət çəkib istefa vermək əvəzinə- iqtisadçıdan sərt açıqlama" sərlövhəli məqalə oxumaq olar.

Müəllif "Azərbaycan Dəmir Yolları"nın (ADY) bu günlərdə Belarusdan ölkəyə 15 milyon dollara vaqon alması məsələsini iqtisadçı-ekspert Nemət Əliyevlə müzakirə edir.

Yazı müəllifi vurğulayır ki, N.Əliyev başqa ölkələrin 1 milyon 700 min dollara aldığı vaqonu ADY-nin Belarusdan 15 milyon dollara alması barədə açıqlamasında qiymətin şişirtmə olduğunu, korrupsiyaya və mənimsəməyə yol verildiyini iddia edib, ADY QSC isə bu iddiaları yalan adlandırıb.

Elə bundan da irəli gələrək müəllif müzakirəni N.Əliyevin özü ilə davam etdirir.

"Açığı çox təəssüf edirəm. Adamların qarşısına rəsmi məlumatları qoyursan, yenə də öz bildiklərini edirlər. Onların açıqlaması onu göstərir ki, adamlar törətdiklərindən peşman olmurlar. O hissləri heç yaxına buraxmırlar", - N.Əliyev "Yeni Sabah"a açıqlamasında bunu bildirib.

Ekspert əlavə edib ki, bu günlərdə səsləndirdiyi rəqəmlər havadan götürülməyib: "30 milyon 384 min pul ödənilməsini mən yaymıram ki... Mən onu Dövlət Statistika Komitəsinin Dövlət Gömrük Komitəsinə istinadən yaydığı məlumata istinad etmişəm. Orada mənbəni göstərmişəm. "Azərbaycan Dəmir Yolları"ndan o açıqlamanı verən adam zəhmət çəksin o yazıya bir baxsın. Onun içindəki linklərə tıklasın məlumatlar qarşısında açılacaq".

N.Əliyev bu qiymətin ortaya çıxması barədə deyir ki, Dövlət Gömrük Komitəsi (DGK) yalandan o məlumatı yaya bilməz, amma "Azərbaycan Dəmir Yolları" gedib xaricdən vaqon alıb Azərbaycana gətirəndə rəsmiləşdirmə prosesində o rəqəmləri göstərib, Dövlət Gömrük Komitəsi də həmin rəqəmi təsdiq edib.

Ekspert deyir ki, Rusiya, Polşa, Gürcüstan da müxtəlif dövrdə Belarusla alver ediblər, o məlumatların da linkləri var, bu ölkələr Belarusdan vaqonun bir ədədini 1,7 milyon dollara alır, amma "Azərbaycan Dəmir Yolları" 15, 2 milyon sayır.

N.Əliyev deyir ki, bu fərq başqa ölkələrlə ticarətdəki kimi 2-3 faiz olsa idi başa düşülən idi ki, ticarətdə belə qiymət fərqi ola bilər, amma 9 dəfə baha alınmanın izahı yoxdur: "O sözü təsadüfən yazmamışam ki, dünya ticarət tarixində belə rüsvayçılıq doğrudan yoxdur".

Müəllif deyir ki, N.Əliyev ADY-nin aldığı vaqonların texniki göstəricilər və dizaynının fərqli olması ilə bağlı iddialarını da cavablandırıb: "Orada nə qədər dizayn işi aparırsan apar, texniki göstəricilər üzərində nə qədər işləyirsən işlə, bu məbləğ mümkün deyil. Qoy, 15% qiymət fərqi yaransın. 10-15 dəfə qiymət fərqi haqqında onların danışmağa üzü də olmamalıdır. 2016-cı ildən bəri dövrə baxdım, Belarusun 15 milyon dollara vaqon satdığı ölkə olmayıb".

Ekspert ADY-nin izahlarına münasibət ifadə edərək deyir: "Adamlar xəcalət çəkib, utanıb yerə girmək, bu rəzalətə görə istefa vermək əvəzinə izah verirlər. Özlərinə haqq qazandırmağa çalışırlar. "Azərbaycan Dəmir Yolları" rəhbərliyindən bundan artıq açıqlama gözləmək mümkün deyil. Adam nə desin? Desin ki, cinayətkaram, dağıtmışam, yemişəm?... "Azərbaycan Dəmir Yolları"nın verməli olduğu açıqlama o olmalı idi ki, gəlib yoxlayın, ölkə miqyasında, insanlarda yalnış təəssürat yaranmasın. Bunu etmək əvəzinə deyirlər yalan məlumatdır. Yox, elə bir düz danışan "Azərbaycan Dəmir Yolları"dır".