AİB sədri Azərbaycanla əməkdaşlığın prioritet sahələrini sadalayıb

Bakı/02.06.20/Turan: Asiya İnkişaf Bankı (AİB) Azərbaycan hökumətinin iqtisadiyyatın şaxələndirilməsinin sürətləndirilməsinə və inklüziv artımın təşviqinə, eləcə də koronavirus böhranından tez bir zamanda iqtisadiyyatın bərpa olunmasına yönəlmiş strateji inkişaf gündəliyinə verdiyi dəstəyi davam etdirəcək. Bu halda, şaxələndirilmiş iqtisadiyyatın tələbatlarına daha yaxşı cavab vermək, dövlət və özəl sektorlar arasında tərəfdaşlığı təşviq etmək üçün infrastrukturun da inkişafı nəzərdə tutulur. 

Bu barədə AİB sədri Masatsuqu Asakava Azərbaycan prezidenti İlham Əliyevin və adı çəkilən beynəlxalq maliyyə təşkilatının rəhbərliyinin iştirakı ilə dünən keçirilən videokonfransda bildirib.

"Dövlət və özəl sektorlar arasında tərəfdaşlıq hökumətlə həyata keçirdiyimiz layihələrin əsas mövzusu kimi qalmaqdadır. İdarəçilik sahəsində olduqca fəal mövqedən çıxış etməliyik. Bu sahəyə xarici borcun ümumi daxili məhsula nisbəti məsələsi aiddir və bu nisbət gözlənildiyindən daha sürətli templə azalmaqdadır", deyə Asakava qeyd edib.

AİB həmçinin yüksək texnologiyalar sahəsində innovasiya layihələrinə sərmayələr yatırılmasını dəstəkləmək niyyətindədir. "İstərdik ki, onların hökumətin strateji hesab etdiyi sahələrə böyük təsiri özünü göstərsin. Məsələn, su ehtiyatları, idarəçilik, maliyyə, enerji səmərəliliyi və digər sahələr", deyə o, sözünə davam edib. 

Birincisi, suvarma və drenaj sistemlərinin inkişaf etdirilməsi layihəsi xüsusi əhəmiyyət kəsb edir. "İkincisi, peşə təhsili və ticarətin liberallaşdırılması da nəzərdə tutduğumuz proqramın bir hissəsidir. Nəhayət üçüncüsü katalizator rolunu oynayacaq kiçik və orta sahibkarlığın maliyyələşdirilməsidir. Biz, həmçinin elektrik enerjisinin paylanması sahəsində götürdüyümüz öhdəliklərə sadiq qalırıq. Bu məqsədlə, elektrik şəbəkəsinin təkmilləşdirilməsinə sərmayə proqramı nəzərdə tutulur. Əgər Sizin hökumət müsbət qərar verərsə, bu proqramlar icra oluna bilər", deyə Asakava prezidentə xitabən bildirib.

Əliyev Azərbaycanın iqtisadiyyatın şaxələndirilməsi planlarına verilən dəstəyə görə  təşəkkür edib və qeyd edib ki, Naxçıvanda suvarma sistemlərinin inkişafı layihəsi AİB ilə razılaşdırılmağa çox yaxındır. Bu layihə üçün kreditin ümumi məbləği təqribən 100 milyon ABŞ dolları olacaq.

"Bundan əlavə, sizin bütün ölkə ərazisində suvarma ilə bağlı planlarımızı nəzərdən keçirməyinizi istərdim. Biz hazırda vəziyyəti qiymətləndiririk və çox böyük su itkiləri ilə üzləşdiyimizi görürük. Bəzi hallarda köhnəlmiş infrastruktura və səmərəli olmayan su idarəetmə sisteminə görə biz suyun 40-50 faizini itiririk".

Eyni zamanda, Azərbaycan bərpa olunan enerji mənbələrini inkişaf etdirmək niyyətindədir.

Bu sahədə fəaliyyət göstərən iki böyük şirkətlə bu ilin yanvar ayında artıq iki ilkin müqavilə imzalanıb. Ümumi enerji hasilatının həcmi 400 meqavat olacaq. İnvestisiya tamamilə xaricdən gələcək və Günəş və küləklə işləyən iki elektrik stansiyası olacaq. Azərbaycan bu sektoru inkişaf etdirmək niyyətindədir. -06В-