AİHM Azərbaycandan 12 ərizə üzrə qərarlarını açıqlayıb

Oktyabrın 17-də Avropa İnsan Hüquqları Məhkəməsi Azərbaycandan 12 ərizə üzrə qərarlarını və hökmlərini elan edib.

Üç ərizə qəbul edilməz sayılıb, qalan bütün işlərdə iddia edilən pozuntular tanınıb, bu barədə Turan-a hüquqşünas Xalid Ağaliyev Strasburq Məhkəməsinin qərarlarını şərh edərkən bildirib.

AİHM Maliyyə Nazirliyinin jurnalist Natiq Ədilova dövlət büdcəsindən Bakı Dövlət Universitetinə ayrılan vəsait haqqında məlumat verməkdən imtina etməsini qanunsuz hesab edib.

AİHM jurnalistə ifadə azadlığının pozulmasına görə 1500 avro ölçüsündə təzminat ödənilməsi barədə qərar verib.

"Simuzər Babayeva Azərbaycana qarşı" işində də AİHM Avropa Konvensiyasının 2-ci (yaşamaq hüququ) və 3-cü (işgəncələrin qadağan edilməsi) maddələrinin pozulduğuna qərar verib.

Şikayət ərizəçinin qardaşının həbsxanada işgəncə altında öldürülməsi ilə bağlı olub. Hüquq-mühafizə orqanları bu faktı inkar edirdilər.

AİHM ərizəçiyə mənəvi zərər əvəzi 35 min avro və məhkəmə xərclərinin qarşılanması üçün 1500 avro ödənilməsi haqqında qərar çıxarıb.

"Rauf Rzayev və digərləri Azərbaycana qarşı" işində ərizəçilər qrupu park salınması ilə əlaqədar məcburi köçürülmədən şikayət edib. AİHM ərizəçilərin mülkiyyət hüquqlarının pozulduğu qərarına gəlib.

Ərizəçilər ədalətli təzminatların müəyyən edilməsini tələb ediblər və AİHM razılıq əldə edilməsi üçün üç ay vaxt verib.

Zöhrab İsmayılov və Aslan Əhmədovun mülkiyyət hüququnun pozulması haqqında şikayətlərini qəbuledilməz hesab edib.

Malik Kərimovun bənzər şikayəti haqqında da eyni qərar qəbul edilib.