AİHM beş gənc fəalın şikayətini təmin edib

Bakı/20.07.17/Turan: Avropa İnsan Hüquqları Məhkəməsi (AİHM) Azərbaycanla bağlı növbəti iki qərarını elan edib. Həmin qərarlar 2011-2013-cü illərdə Bakıda keçirilən etiraz aksiyalarında saxlanılan 5 nəfərin şikayəti əsasında çıxarılıb. Onlar Dəyanət Babayev, Ülvi Həsənli, Şahin Mirzəyev, Turqut Qəmbər və İlkin Rüstəmzadədir.

Qərarda göstərilir ki, D.Babayev etiraz aksiyasında iştirakına görə 2011-ci ildə 10, 2012-ci ilin oktyabrında yenidən 10, noyabr ayında isə 7 gün inzibati qaydada həbs edilib.

Ü.Həsənli 2011-ci ilin martında 7, 2012-ci ilin oktyabrında isə 7 gün inzibati həbs cəzası alıb.

Ş.Mirzəyev, T.Qəmbər və İ.Rüstəmzadə isə 2013-cü ilin yanvar, mart və sentyabr aylarında keçirilmiş aksiyalarda saxlanıblar.

Şikayətçilər əvvəlcə yerli məhkəmələrə müraciət ediblər. Onlar saxlanmalarını hüquqlarına müdaxilə kimi qiymətləndirərək pozuntuların tanınmasını tələb ediblər. Amma yerli məhkəmələr onların şikayətlərini təmin etməyib və AİHM-ə şikayət verilib.

AİHM şikayətçilərin iddia etdikləri pozuntuları tanıyıb. Qərara görə, etiraz aksiyasında saxlanılan şikayətçilərin Avropa Konvensiyasının 5-ci (azadlıq və toxunulmazlıq hüququ), 6-cı (ədalətli məhkəmə araşdırması hüququ) və 11-ci (toplaşmaq hüququ) maddələri ilə hüquqları pozulub.

Azərbaycan hökuməti D.Babayev, Ü.Həsənli və T.Qəmbərin hər birinə mənəvi zərərə görə 10 min avro, Ş.Mirzəyevə 8, İ.Rüstəmzadəyə isə 6 min avro ödəməlidir.

T.Qəmbərə əlavə olaraq 2 min 860 avro ödənilməlidir.

Bundan əlavə, D.Babayev və Ü.Həsənlinin işində hökumət hüquqi məsrəflərdən ötrü ümumilikdə 1300 avro ödəməlidir.

Habelə, hüquqi məsrəflərdən ötrü Ş.Mirzəyevlə T.Qəmbərə birlikdə 1150, İ.Rüstəmzadəyə isə 2 min avro verilməlidir.

Qərarlar 3 aydan sonra qüvvəyə minir.-16d-