AİHM REAL lideri İlqar Məmmədovun hüquqlarının pozulduğunu təsdiq edib

Bakı/30.05.19/Turan: Tarixdə ilk dəfə Avropa İnsan Hüquqları Məhkəməsi Avropa Şurası Nazirlər Komitəsinin AİHM-nin İlqar Məmmədovun işi üzrə qərarının icra edilməməsi haqqında sorğusuna baxıb.

Bu barədə Turan agentliyinə Məmmədovun vəkili Fuad Ağayev bildirib.

AİHM-nin Böyük Palatası Azərbaycanın İnsan Hüquqlarının və Əsas Azadlıqlarının Müdafiəsi haqqında Konvensiyanın 46-cı maddəsinin 1-ci paraqrafını - AİHM-nin qərarlarını icra etmək öhdəliyini pozduğu qənaətinə gəlib. 17 hakimin hamısı bunun lehinə səs verib", deyə Ağayev bildirib.

Vəkil qeyd edib ki, qərarda Azərbaycan hökumətinin məhdud addımlarının Avropa Məhkəməsinin Bakının "vicdanlı" davrandığı barədə nəticə çıxarmasına imkan vermir.

"Qərarın 192-ci paraqrafında deyilir: Məmmədovun işi üzrə ilk qərar və müvafiq restitutioin integrum öhdəliyi (əvvəlki müddəanın bərpası) dövlətin üzərinə AİHM tərəfindən sui-istifadə kimi qiymətləndirilmiş ittihamları ləğv etmək öhdəliyi qoyub. Amma ittihamlar ləğv edilməyib, əksinə, Məmmədov məhz bu ittihamlarla yenidən həbs edilib", deyə Ağayev qeyd edib.

İlqar Məmmədov və müdafiəçiləri hesab edirlər ki, AİHM-nin bu qərarı onu işinə Azərbaycan Ali Məhkəməsinin Plenumunda baxılması üçün əsas verir. Ali Məhkəmə onun işi üzrə bütün məhkəmə aktlarını ləğv etməli və cinayət hadisəsi olmadığına görə icraata xitam verməlidir ki, bu da bəraət deməkdir.

* İlqar Məmmədov müxalif Respublikaçı Alternativ Partiyasının lideridir. 2013-cü ildə o, prezident seçkilərində namizədliyini irəli sürüb, amma 2013-cü ilin fevralında İsmayıllı rayonunda iğtişaşlar təşkil etmək ittihamı ilə həbsedilib və 7 il müddətinə azadlıqdan məhrum edilib.

2018-ci ilin avqustunda Şəki Apellyasiya Məhkəməsi onu azad edib, qalan müddəti 2 il sınaq müddəti olmaqla, şərti cəza ilə əvəz edib.

Martın 28-də Ali Məhkəmə İlqar Məmmədovu 2 il sınaq müddəti olmaqla, şərti cəzanın qalan hissəsindən azad edib. -0-