Akif Qurbanov ailəsinin mülkiyyəinə həbs qoyulmasından narahatdır

Hazırda 1 saylı Bakı İstintaq Təcridxanasında saxlanılan “III Respublika Platforması”nın (ResPlatforma) spikeri Akif Qurbanov ailəsinə məxsus əmlaka həbs qoyulması ilə bağlı açıqlama yayıb. Açıqlama Qurbanova məxsus olduğu bildirilən facebook səhifəsində dərc edilib.

Qurbanov həbsindən qabaq mənbəyi məlum olan vəsaitlə əldə edilmiş ailəsinə məxsus daşınan və daşınmaz əmlaka həbs qoyulmasından narahatdlır.

Qurbanov bildirir ki, bu günə qədər istər Mərkəzi Seçki Komissiyasının üzvü olarkən, istər ictimai fəaliyyətində, istərsə də ResPlatformanı elan etdiyi dönəmdən siyasi fəaliyyətində kimsənin şəxsiyyətini hədəf alan, kimsəyə qarşı etikadan kənar və düşmən münasibəti ifadə edən açıqlamaları olmayıb.

“Mənim və birgə mübarizə apardığım dostlarımın ailəsindən, qohumlarından əl çəkin. Onları bu prosesə qatmayın. Rabitə və nəqliyyat imkanlarından, mülkiyyətdən məhrum etməklə ailəmə əziyyət verməyin. Biz mübarizəmizi elan etdiymiz dəyərlər çərçivəsində aparmışıq. Sizi də eyni cür davranmağa dəvət edirəm”, o qeyd edib.

Akif Qurbanov bildirir ki, o həbs olunandan sonra atasının övladlarını məktəbdən evə apararkən avtomobili saxlanılıb və övladlarının komputerləri, telefonları götürülür.

“Atamın telefonları da həmçinin götürülüb. Sonradan güya ResPlatformanın ofisindən aşkar olunmuş kimi rəsmiləşdirilir. Həyat yoldaşımın halal maaşı ilə alınan torpaq və üzərində tikilən bağ evinin (necə əldə olunma məlumatı və gəlir mənbəyi ictimailəşib) istintaqın məni ittiham etdiyi dövrdən əvvəl alındığı halda üzərinə həbs qoyulub. Atamın istintaqın araşdırdığı dövrdən əvvəl aldığı, uşaqların bağça və məktəbə aparılıb gətirilməsi, ailənin zəruri ehtiyacları, məni həbsxanada ziyarət etmək və sovqat gətirmək üçün istifadə olunan son avtomobili də götürüb şəxsi nəqliyyat imkanından ailə üzvlərimi məhrum etməklə sizin məmurlar və şəxsən siz nəyə nail olmaq istəyirsiz?”, o ölkə başçısına sual ünvanlayıb.

Martın 6-da hüquq-mühafizə orqanları "Toplum TV", "Demokratik Təşəbbüslər İnstitutu", həmçinin "III Respublika Platforması"nın ofislərində, bir neçə əməkdaşın evində axtarış aparıb. Məlumata görə, iyirmidən çox əməkdaş polis tərəfindən saxlanılıb, bir neçə saat sonra əməkdaşların əksəriyyəti sərbəst buraxılıb. Lakin "Toplum TV"nin ofisinin qapısı möhürlənib. "Toplum TV"nin jurnalistləri Fərid İsmayılova (polisin nəzarətinə verilməklə ev dustaqlığı qətimkanim tədbiri seçilib), Müşfiq Cabbara, Elmir Abbasova (polisin nəzarətinə verilməklə ev dustaqlığı qətimkan tədbiri seçilib) və "Demokratik Təşəbbüslər İnstitutu"nun rəhbəri, həmçinin "III Respublika Platforması"nın spikeri Akif Qurbanova, eləcə də Əli Zeynala, Ramil Babayevə, İlkin Əmrahova qaçaqmalçılıq ittihamı ilə cinayət işi açılıb və barələrində 4 aylıq həbs qətimkan tədbiri seçilib.

Martın 8-də "III Respublika Platforması"nın qurucu heyət üzvü Ruslan İzzətli və "Toplum TV"nin həmtəsisçisi Ələsgər Məmmədli həbs olunub. Xətai Rayon Məhkəməsi onlar barəsində 4 aylıq həbs qətimkan tədbiri seçib. Hər ikisi də qaçaqmalçılıqda ittiham olunur.

Bu ilin iyul ayından başlayaraq bütün həbs olunanların həbs qətimkan tədbiri bir neçə dəfə uzadılıb.