AKXCP bələdiyyə seçkilərinin demokratik şəraitdə keçirilməsini tələb edir

Azərbaycan Klassik Xalq Cəbhəsi Partiyası (AKXCP) bəyanatla çıxış edərək, Azərbaycan hakimiyyətini dekabrda bələdiyyə seçkilərinin demokratik şəraitdə keçirilməsini təmin etməyə çağırıb.

Bəyanatda qeyd edilib ki, 1999-cu ildə Azərbaycanda yerli özünüidarə institutunun yaradıldığı gündən etibarən bələdiyyələr icra hakimiyyətinin əlavəsi olub.

Seçkilərin saxtalaşdırılması, zəruri qanunvericilik bazasının olmaması, qanunların yerinə yetirilməməsi, yerli özünüidarəyə məhdud səlahiyyətlər verilməsinin nəticəsi olaraq bələdiyyələr real hakimiyyətdən məhrum iş bacarığı olmayan qurumlara çevrildilər.

Daha sonra AKXCP 2014-cü ilin dekabrında azad, ədalətli və şəffaf bələdiyyə seçkilərinin keçirilməsi üçün bir sıra tədbirlər təklif edir.

Xüsusən, beynəlxalq təşkilatların tövsiyələrinə uyğun olaraq Seçki Məcəlləsinə dəyişikliklər etmək, o cümlədən siyasi partiyaların seçki komissiyalarında balanslı şəkildə təmsil olunmasını təmin etmək təklif edilir.

AKXCP həmçinin seçici siyahılarını dəqiqləşdirməyə, seçkiqabağı demokratik mühit formalaşdırmağa, şikayətlərə obyektiv baxılması mexanizmləri yaratmağa və icra hakimiyyəti orqanlarının seçki prosesinə qanunsuz müdaxiləsinin qarşısını almağa çağırır.

Bununla belə, AKXCP siyasi partiyaları, vətəndaş cəmiyyətini, ziyalıları, gəncləri və qadınları, cəmiyyətin bütün təbəqələrini bələdiyyə seçkilərində fəal iştirak etməyə çağırır. -06D-