Ali Məhkəmənin Plenumunun qərarı Əli İnsanova verilmir

“Ali Məhkəmənin Plenumundan 17 gün keçməsinə baxmayaraq, plenumun mənimlə bağlı qərarı hələ mənə təqdim edilməyib. Plenumun qərarını yubatmadan mənə təqdim etməyinizi xahiş edirəm”. By barədə hazırda həbsdə olan sabir səhiyyə naziri Əli İnsanovun Ali Məhkəmənin sədri Ramiz Rzayevə bu gün göndərdiyi məktubda deyilir. 

Noyabrın 15-də Azərbaycan Ali Məhkəməsinin Plenumu Avropa İnsan Hüquqları Məhkəməsinin (AİHM) Əli İnsanovla bağlı qərarına baxaraq, Ali Məhkəmənin və Bakı Apellyasiya Məhkəməsinin onun işi üzrə hökmlərini ləğv edib. Eyni zamanda, Plenum birinci instansiya məhkəməsinin İnsanovun 11 il müddətinə azadlıqdan məhrum edilməsi haqqında hökmünü qüvvədə saxlayıb. Lakin Plenumun qərarına əsasən, AİHM-nin göstərişi nəzərə alınmaqla, iş təkrar məhkəmə istintaqı üçün Bakı Apellyasiya Məhkəməsinə göndərilir. 

Vəkili Toğrul Babayev məhkəmənin qərarını ədalətsiz və qeyri-obyektiv adlandırıb. O hesab edir ki, Bakı Apellyasiya Məhkəməsi AİHM-nin qərarından irəli gələrək, İnsanovu həbsdən azad etməli idi. 

AHİM 14 mart 2013-cü ildə əli İnsanov barəsində qərar çıxararaq, sabiq nazirin Azərbaycan hökumətinə qarşı ədalətli məhkəmə təhqiqatı hüququnun pozulması və ona qarşı işgəncə tətbiq edilməsi ilə əlaqədar iddiasını təmin edib. Bundan başqa, AİHM-nin qərarına əsasən, Azərbaycan hökuməti kompensasiya kimi İnsanova 10 min avro ödəməlidir. AİHM-nin qərarı iyunun 14-də qüvvəyə minib.

Əli İnsanov 2005-ci il parlament seçkiləri ərəfəsində həbs edilib. O, əvvəlcə dövlət çevrilişinə cəhddə ittiham olunub, daha sonra ittiham ayrıca icraata ayrılıb və 2007-ci ilin aprelində o, iqtisadi cinayətlərə görə mühakimə olunub və 11 il azadlıqdan məhrumetmə cəzasına məhkum edilib. 

İnsanov Ali Məhkəmənin sədrinə ünvanladığı məktubda bildirir ki, Plenumun qərarının ona təqdim edilməməsi bütün  vasitələrlə həbsdə saxlanmasının müddətini uzatmağa xidmət edir.   

“Unutmayın ki, mənin həbsdə qanunsuz saxlamağımın hər gününə görə məsuliyyət daşıyırsıniz”, o qeyd edir. 

İnsdanov hesab edir ki, Ali Məhkəminin Plenumun 15 noyabr iclasının qərarı siyasidir. 

“Sizin sədrliyiniz ilə keçirilən Plenum siyasi hakimiyyətin sifarişi ilə məni azadlığa buraxmamaq məqsədi ilə birinci  instansiya məhkəməsinin  hökmünü qərəzli olaraq qüvvədə saxlayıb. Amma, Plenum həmin qanunsuz hökmü təsdiq etmiş Apellyasiya və kassasiya məhkəmələrirnin qərarını ləğv edib. Nəticədə  AİHM-nin 14 mart qərarı icra edilməyib, mən qnunsuz olaraq azadlığa buraxılmamışam. Bu  günə kimi 13 saylı cəzaçəkmə müəssisəsində dözülməz şəraitdə saxlanıram, işgəncələrə məruz qalıram”, İnsanovun Ali Məhkəminin sədrinə ünvanladığı məktubunda deyilir. -03B-