Amerika tarixçiləri İqbal Əbilovu azad etməyə çağırıblar

Amerika Tarix Assosiyasiyası (American Historical Association) məktubla Azərbaycan prezidenti İlham Əliyevə müraciət edərək, tədqiqatçı İqbal Əbilovu azad etməyə çağırıblar.

Assosiasiya 2024-cü ilin iyulunda Azərbaycana səfəri zamanı həbs edilmiş etnik talış tarixçi "İqab Əbilovun şəxsi təhlükəsizliyi və azadlığı ilə bağlı ciddi narahatlığını" ifadə edib.

"Əbilova qarşı ittihamlar irəli sürülüb və o, Bakıda akademik azadlıq hüququnu dinc şəkildə həyata keçirdiyinə - beynəlxalq insan hüquqları sazişlərində birbaşa müdafiə olunan hərəkətlərə görə həbs edilib", deyə Assosiasiyanın müraciətində bildirilir.

Tarixçilərin hüququ tədqiqat aparmaqdan və öz rəylərini dərc etməkdən ibarətdir. "Bu, peşənin və bütünlükdə akademik azadlığın əsas prinsiplərindən biridir. Bu hüquq xüsusilə əlverişsiz tarixi həqiqətlərin üstünü açan tədqiqatlara şamil edilir", deyə müraciətdə vurğulanır.

Müraciət müəllifləri Əbilovun və " Azərbaycanda fərqli düşüncə və ya tənqidi baxışlarına görə əsassız olaraq saxlanılmış və ya həbs edilmiş digər şəxslərin" azad edilməsini tələb ediblər.

* Amerika Tarix Assosiasiyası dünyada peşəkar tarixçilərin ən böyük təşkilatıdır və bütün dünyadan 10 500-ə yaxın üzvü var.

**  İqbal Əbilov iyulun 22-də Azərbaycana qohumlarının yanına gəldiyi zaman saxlanılıb. Ona qarşı Azərbaycan Cinayət Məcəlləsinin 274 (dövlətə xəyanət), 281.3 (xarici təşkilatların və ya onların nümayəndələrinin tapşırığı ilə dövlətə qarşı yönəlmiş ictimai çağırışlar) və 283.1-ci (milli, irqi, sosial və ya dini nifrət və düşmənçiliyin qızışdırılması) maddələrilə ittiham irəli sürülüb.

Xüsusən, bütün bu cinayətlərin Ermənistan xüsusi xidmətlərinin göstərişi ilə törədildiyi iddia olunur.

Əbilov ittihamları qəbul etmir və müstəsna olaraq elmi fəaliyyətlə məşğul olduğunu bildirir. Dünyanın müxtəlif ölkələrindən olan alimlərdən ibarət böyük bir qrup Əbilovun azad edilməsində köməklik göstərilməsi xahişi ilə Azərbaycan rəhbərliyinə müraciət edib. Hüquq müdafiəçiləri Əbilovu siyasi məhbus kimi tanıyıblar. Noyabrın 19-da məhkəmə Əbilovun həbs müddətini 4 ay uzadıb.