A.Mişenko: Bu, işğal faktıdır

Ukraynanın Azərbaycandakı səfiri Aleksandr Mişenko Ukrayna və Krımda baş verən hadisələrə dair bazar ertəsi “İntefaks-Azərbaycan” agentlyinin ofisində mətbuat konfransı keçirib.

Səfir Rusiyanın Krıma hərbi qüvvələr yerləşdirilməsini Ukraynaya qarşı açıq təcavüz, işğal adlandırıb. Kremlin bu addımı “rusdilli əhalinin təhlükəsizliyini qorumaq” adlandırmasını A.Mişenko demaqogiya kimi dəyərləndirib. Rusiyanın mövqeyini səfir “beynəlxalq hüquq”a qarşı “zor hüququ”nu qoyması adlandırıb.

Ukraynanı müdafiə məsələsində dünya bilriyinin mövqeyini müsbət sayan səfir dünya birliyinin hələ belə birlik nümayiş etdirmədiyini söyləyib. Onun sözlərinə görə, ictimai rəy məsələsində Rusiya təklənib, onun yanında Şimali Koreya və Suriya kimi dövlətlər qalıb. Daha sonra səfir Ukrayna ilə Rusiya arasındakı qarşıdurmanın təkcə bu iki dövlətə aid olmadığını, dünya-Rusiya qarşıdurması olduğunu vurğulayıb. Səfir Ukraynada rusdilli əhaliyə qarşı hücumlar olması haqda Rusiya KİV-lərinin təbliğatını yalan və böhtan adlandırıb. Onun fikrincə, bu təbliğat XX sərin 90-cı illərində sovet respublikalarında başlamış azadlıq mübarizələrinə Kremlin atdığı yalan və böhtanların davamıdır.

A.Mişenko Ulkraynada hadisələrin bu duruma gəlməsinə görə keçmiş prezident Viktor Yanukoviçi və onun vəzifəyə təyin etdiyi ruspərəst məmurları ittiham edib.

Onun sözlərinə görə, Ukraynada baş verənlər təsadüfi deyil, Kremlin məqsədyönlü siyasətinin nəticəsidir. Ukraynanın şərqində ruslarla yerli əhali arasında hər-hansı qarşıdurma olmadığı, bunu RF xüsusi xidmət qurumlarının yaratdığı iddia edilib.

Rəsmi Kremlin Ukraynada hakimiyyətə faşistlərin gəlməsi təbliğatını yalan sayan səfir bu faşizmi Rusiyadakı faşistlərin yaratdığını bildirib.

Səfir Ukraynaya münasibətdə rus KİV-lərinin informasiyalarını dezinformasiya kimi dəyərləndirib və bu sırada Dmitri Kiselyov və onun kimiləri xüsusi tənqid atəşinə tutub.

Krımda martın 16-da keçirilmiş referenduma gəlincə, səfir dövlətinin bu referendumu və nəticələrini tanımadığını bəyan edib.

Ukraynaya münasibətdə Azərbaycanın rəsmi mövqeyini müsbət sayan səfir dövlətinin də hər zaman Azərbaycanın yanında olacağını bəyan edib.

Hələ Rusiyanın düşünməyə vaxtı olduğunu deyən səfri zərərin yarısından da qayıtmağın da mümkünlüyini bildirib. Amma Rusiya işğaldan əl çəkmədiyi halda Ukrayna dövləti və xalqının bütün vasitələrlə ərazi bütövlüyünü qorumaq hüququndan istifadə edəcəyi bəyanatı səsləndirib. -05C-