Amnesty International İlqar Məmmədovun və Tofiq Yaqublunun azadlığa buraxılmasını tələb edir

  Amnesty International beynəlxalq hüquq-müdafiə təşkilatı saxta ittihamlarla bir ildən artıq həbsdə saxlanılan siyasi xadimlər İlqar Məmmədovun və Tofiq Yaqublunun dərhal azad edilməsinə çağırıb.

Martın 17-də Şəkidə 2013-cü il 23-24 yanvar İsmayıllı iğtişaşları üzrə ittiham edilən bir qrup şəxsin barəsində hökm çıxarılması gözlənilir.

“Görünür, Azərbaycan hakimiyyəti bu cür əməllərə son qoymamaq və öz opponentlərini cəzalandırmaq qərarına gəlib. Əslində Yaqublu və Məmmədov heç bir hadisə törətməyiblər, sadəcə, vəziyyətlə tanış olmaq üçün İsmayıllıya gediblər. Onlar hökuməti tənqid etdiklərinə görə cəzalandırılır”, -  Amnesty International-ın Avropa və Asiya üzrə nümayəndəsi Denis Krivoşeyev bildirib.

Onların günahı sübuta yetirilərsə hər ikisini iğtişaşların təşkilatçısı kimi 12 ilədək həbs cəzası gözləyir.
“Hakimiyyət ölkədəki hər hansı narazılığı və ya tənqidi qəbul etmir.

İlqar Məmmədov və Tofiq Yaqublu dərhal azadlığa buraxılmalıdır, onların üzərindən bütün ittihamlar götürülməlidir”, - D. Krivoşeyev vurğulayıb.

İş üzrə 17 nəfər keçir.-02D-