Apellyasiya Məhkəməsi Azərbaycan Xalq Cəbhəsi Partiyasının fəalını həbsdə saxlayıb

Bakı Apellyasiya Məhkəməsi Azərbaycan Xalq Cəbhəsi Partiyasının fəalı Tehran Abdullayevin narkotik maddə istifadəsi ilə bağlı inzibati həbsini qüvvədə saxlayıb.

Abdullayevin həbsindən şikayətə ötən həftənin sonu Bakı Apellyasiya Məhkəməsində baxılıb, vəkil Nemət Kərimli Turan-a bildirib.

Polisin məlumatına görə, Abdullayev küçədə özünü "qəribə" aparıb, ona görə də narkotik maddədən istifadə şübhəsilə onu saxlayıblar.  Guya müayinədən sonra fəalın narkotik maddədən istifadə etməsi təsdiqlənib, buna görə də onu məhkəməyə veriblər, o da 20 gün həbs cəzası təyin edib, vəkil qeyd edib.

Lakin Abdullayev ittihamı rədd edib. "Tehran Abdullayev dedi ki, əslində onu tikinti materialları mağazasında saxlayıblar. Narkotik maddənin necə olduğunu belə bilmir və bundan uzaqdır. Abdullayev dedi ki, bir neçə gün onu hansı ittihamla həbs etdiklərini bilməyib. Abdullayev öz həbsini Xalq Cəbhəsi Partiyasına üzvlüyü və siyasi fəaliyyətilə əlaqələndirib", - Kərimli deyib.

Müdafiə tərəfi inzibati işin dayandırılmasını və ya ən azı cəzanın 10 günə endirilməsini və  bu müddətin bitməsilə əlaqədar onun azad edilməsini istəyib.

Lakin məhkəmə həbs barədə qərarı qüvvədə saxlayıb.

*Oktyabrın 15-də Azərbaycan Xalq Cəbhəsi Partiyasının fəalı Tehran Abdullayev narkotik maddədən istifadə ittihamı ilə inzibati qaydada 20 sutka həbs edilib. O,  ittihamı rədd edib və həbsini siyasi fəaliyyətilə əlaqələndirib. Azərbaycan Xalq Cəbhəsi Partiyasında da Tehran Abdullayevin təqib edilməsinin siyasi motivli olduğunu bildiriblər.