Apellyasiya Məhkəməsi Hilal Məmmədov barəsində ittiham hökmünü qüvvədə saxlayıb

Bu gün Bakı Apellyasiya Məhkəməsində hakim Camal Ramazanovun sədrliyi ilə “Tolışi sədo” qəzetinin baş redaktoru Hilal Məmmədovun apellyasiya şikayətinə baxılıb.

Şikayət Ağır Cinayətlərə dair İşlər üzrə Məhkəmənin Məmmədovun dövlətə xəyanət, milli ayrı-seçkilik salma və narkotik ticarəti ittihamları ilə 5 il müddətinə azadlıqdan məhrum edilməsi haqqında 27 sentyabr tarixli qərarından verilib.

Vəkil Ramiz Məmmədovun Turan-a verdiyi məlumata görə, şikayətə qapalı rejimdə baxılıb. Vəkilin sözlərinə görə, Bakı Apellyasiya Məhkəməsi şikayətə formal baxıb, müdafiə tərəfin ibtidai istintaq zamanı və birinci instansiyada işə baxılması zamanı Məmmədovun hüquqlarının pozulması haqqında arqumentlərini və dəlilləri diqqətə almayıb və H.Məmmədovun apellyasiya şikayətini təmin etməyib. BAM-nin qərarından Ali Məhkəməyə şikayət veriləcək.

Qeyd edək ki, BAM-nin bugünki qərarı ilə H.Məmmədov barəsində hökm qanuni qüvvəyə minib.

Bu, həmçinin H.Məmmədovun adının əfv sərəncamına salınması üçün hüquqi əsas yaranması deməkdir.

* Məmmədov 21 iyun 2012-ci ildə DİN-in Narkotiklərə qarşı Mübarizə İdarəsinin əməkdaşları tərəfindən qanunsuz narkotik ticarəti ittihamı ilə həbs edilib. Sonradan o, dövlətə xəyanətdə və milli ayrı-seçkilik salmaqda ittiham olunub.

Yerli hüquq müdafiəçiləri Məmmədovun İnternetdə yerləşdirdiyi “Tı, kto takoy, davay, do svidania” videoçarxı ilə bağlı tənqidi şərhlərinə görə təqib edildiyi qənaətindədirlər. Belə ki, Məmmədov bu klipin Azərbaycanı hakimiyyətin böyük vəsait xərclədiyi “Eurovision” müsabiqəsindən daha çox məşhurlaşdırdığını qeyd edib. Amnesty İnternational Məmmədovu “vicdan məhbusu” kimi tanıyıb. -06D-