Apellyasiya Məhkəməsi Qubad İbadoğlunun şikayətini təmin etməyib

Fevralın 23-də Bakı Apellyasiya Məhkəməsi müxalifətçi siyasətçi və iqtisadçı- alim Qubad İbadoğlunun həbs müddətinin üç ay uzadılmasına dair şikayətini təmin etməyib.

Bundan öncə  Apellyasiya Məhkəməsi İbadoğlunun iyulun 23-də saxlanıldığı zaman götürülmüş mobil telefonu istintaq orqanının geri qaytarmaması barədə digər şikayətini təmin etməyib. Bunu Turan-a siyasətçinin qardaşı Qalib Bayramov bildirib.

O?  həmçinin, qeyd edib ki, Qubad İbadoğlunun vəkilləri onun səhhətinin kəskin pisləşməsinə baxmayaraq, yetərli tibbi xidmətlə əhatə olunmaması və Penitensiar Xidmətin Müalicə Müəssisəsinə köçürülməməsi ilə bağlı Avropa İnsan Hüquqları Məhkəməsinə şikayət edib.

*23 iyul 2023-cü ildə Nərimanov Rayon Məhkəməsi Azərbaycan Demokratiya və Rifah Partiyasının sədri Qubad İbadoğlunu 3 ay 26 gün müddətinə həbs edib. O, saxta pulların hazırlanmasında (Azərbaycan Cinayət Məcəlləsinin 204.3.1-ci maddəsi), həmçinin ekstremizmyönlü materialların saxlanması və yayılmasında (167-3.1-ci maddə) ittiham olunub.

Bəzi ölkələr və beynəlxalq təşkilatlar, o cümlədən ABŞ Dövlət Departamenti, ABŞ senatorları və konqresmenləri Qubad İbadoğlunu azad etməyə çağırıblar.