Apellyasiya Məhkəməsi Sevinc Vaqifqızının vəsatətini təmin etməyib

Bakı/27.11.23/Turan: Bu gün Bakı Apellyasiya Məhkəməsi “Abzas Media”nın baş redaktoru,  xarici valyuta qaçaqmalçılığında ittiham olunan Sevinc Vaqifqızının həbsindən şikayəti təmin etməyib.

Sevinc Vaqifqızının anası Ofeliya Məhərrəmova jurnalistlərə bildirib ki, qızı günahkar deyil, o, uydurma ittihamla həbs olunub.

"Redaksiyanın ofisində böyük miqdarda pul aşkar edildiyi iddia edilir, bəs niyə əskinaslardan barmaq izləri götürmədilər, çünkü orada Sevincin barmaq izləri yoxdur", - ana deyib.

Məhərrəmovanın sözlərinə görə, Vaqifqızına ailəsilə telefon əlaqəsi yaratmağa imkan vermirlər.

"Qızım bilirdi ki, Bakıda onu həbs edəcəklər, biz bunu bilirdik,  mən xaricə, qızıma zəng elədim və xahiş etdim ki, qayıtmasın. Ancaq Sevinc cəsarətli qızdır,  dedi ki, jurnalist kimi işini görəcək, qoy, hakimiyyət də öz işilə məşğul olsun", - Məhərrəmova deyib.

* Sevinc Vaqifqızı, “Abzas Media”nın direktoru Ülvi Həsənli və fəal Məhəmməd Kekalov noyabrın 20-21-də saxlanılıblar. Onlara qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən törədilmiş qaçaqmalçılıq) maddəsilə ittiham irəli sürülüb.

Onlar ittihamı rədd ediblər, beynəlxalq təşkilatlar həbs olunanların azad edilməsinə çağırıblar. –0-