Aqil Hümbətov həbsxanada ona pulsuz dərman verilməsinə nail olub

Azərbaycan Xalq Cəbhəsi Partiyasının üzvü, hüquq müdafiəçilərinin siyasi məhbus kimi tanıdıqları Aqıl Hümbətov 2 saylı  koloniya rəhbərliyinin onun tibbi preparatlarla pulsuz təminatı ilə bağlı  hüququnu həyata keçirməsinə nail olub. Penitensiar Xidmətin islah müəssisəsinin rəhbəri ilə söhbətdən sonra o, koloniya həkiminin qərarını ləğv etməyi və məhbusa lazımi dərmanları verməyi tapşırıb. Bu barədə Turan-a məhbusun xanımı Aygün Hümbətova bildirib.

"Həyat yoldaşım həbs olunduğu gündən mədə pozgunluğundan əziyyət çəkir. Bu yaxınlarda ayağını zədələyib. Ona xəstənin vəziyyətini yüngülləşdirmək və yaranı dezinfeksiya etmək üçün üç sadə dərmandan istifadə tövsiyə edilib. O, həkimə müraciət edərək   dərman verilməsini xahiş edib. Ancaq koloniyanın həkimi kobud şəkildə deyib ki, o sağlamdır. Aqil dövlətin məhbusları lazım olan hər şeylə təmin etmək öhdəliyini həkimə xatırladıb, lakin kobud cavab təkrarlanıb. Elə həmin gün axşam Hümbətov koloniya rəisinin qəbuluna düşmək istədiyini bildirib. Rəis onu dinlədikdən sonra həkimin qərarını ləğv edib", - Hümbətova deyib.

Hümbətov Bakı ətrafındakı şəxsi həyətlərdən zibillərin daşınması ilə məşğul olub. 11 avqust 2021-ci ildə saxlanılıb. Bakı Ağır Cinayətlər Məhkəməsi zibil daşımaq üçün onu çağıran kişiyə xəsarət yetirdiyinə görə Hümbətovu Cinayət Məcəlləsinin 126.1-ci maddəsilə (qəsdən sağlamlığa ağır zərər vurma) təqsirli bilərək 10 il müddətinə həbs cəzasına məhkum edib.  

Hümbətov özünü günahkar saymır,  zərərçəkmişə hücum etmədiyini, müxalifətyönlü fəaliyyətinə görə cəzalandırılması üçün polis təxribatının qurbanı olduğunu bildirir. Hüquq müdafiəçiləri Aqil Hümbətovu siyasi məhbus kimi tanıyıblar.