Arif Məmmədov Aİ yanında İƏT missiyasının rəhbəri postundan istefa verib

 Azərbaycanlı diplomat Arif Məmmədov İslam Əməkdaşlıq Təşkilatının nümayəndəsi vəzifəsindən istefa verib. O, peşəkar siyasətlə məşğul olmaq niyyətindədir. Bu barədə “Azadlıq” qəzetinə bildirib. A.Məmmədov vəzifəsindən geri çağırılması barədə hökumətyönlü qəzetlərdə yazılan məlumatları təkzib edib.

“«Artıq heç kəsə sirr deyil ki, mən peşəkar siyasətə gələrək ölkəmin və xalqımın problemləri ilə məşğul olacağımla bağlı bəyanat vermişəm. Bu bəyanat bütün ölkə ictimaiyyətinə, eləcə də Avropanın siyasi çevrələrinə bəllidir. Hər kəs anlayışlı qarşılayar ki, mənim siyasətçi olaraq konkret bir beynəlxalq təşkilatın səfiri vəzifəsilə özümü məhbdudlaşdırmağım doğru alınmazdı. Hesab edirım ki, bu vəzifədən istefa verməli idim və bunu da etdim”, - A.Məmmədov bildirib.

A.Məmmədov 2013-cü ildən Aİ yanında İslam Əməkdaşlığı Təşkilatı missiyasının rəhbəri olub. Mayın 19-da Bakıda baş vermiş yanğın zamanı vətəndaşların ölümünə görə məmurların məsuliyyət daşıdığını bəyan etdikdən sonra hökumətyönlü mətbuatda ona təzyiqlər başlayıb. Onun Facebook-da bununla bağlı yazdığı statusu dəstəkləyən beş əməkdaş işdən çıxarılıb.—06D-