AŞ Baş katibi İ.Məmmədova qarşı yeni ittiham irəli sürülməsini pisləyib

Avropa Şurasının baş katibi Turbyern Yanqland “Respublikaçı Alternativ” (ReAl) vətəndaş hərəkatının rəhbəri İlqar Məmmədova qarşı yeni cinayət ittihamı irəli sürülməsi ilə bağlı narahatlığını və məyusluğunu bildirib.

Xatırladaq ki, Məmmədov 4 fevral 2013-cü ildə 23-24 yanvar İsmayıllı hadisələri ilə əlaqədar həbs edilib. Ona qarşı CM-in 233 (ictimai asayişin pozulmasına yönəlmiş hərəkətlərin təşkili və ya onlarda iştirak) və 315.2-ci (hakimiyyət nümayəndəsinə güc tətbiq etməklə müqavimət göstərmək) maddələri ilə ittiham irəli sürülüb.

Lakin mayın 1-də 233-cü maddə 220.1-ci (zorakılıq və talanla müşaiyət olunan kütləvi iğtişaşların təşkili) maddə ilə əvəz edilib. Bu maddə daha ağır cəza – 12 ilədək azadlıqdan məhrumetmə nəzərdə tutur.

Bununla əlaqədar olaraq mayın 3-də Yanqland xüsusi bəyanatla çıxış edib. “Beynəlxalq ictimaiyyətin İlqar Məmmədovu azad etmək çağırışlarına baxmayaraq, Azərbaycan hakimiyyəti ona qarşı yeni ittiham irəli sürüb. Bu, Azərbaycanın Avropa Şurası Nazirlər Komitəsində 2014-cü ilin mayından etibarən gözlənilən sədrliyi fonunda xüsusilə məyusluq və həyəcan doğrurur.

AŞ Bakıdakı nümayəndəsinin fevralda İlqar Məmmədovun işi üzrə ilkin məhkəmə prosesinə buraxılmaması azmış kimi, bu yaxınlarda Azərbaycanda səfərdə olan AŞ nəzdində bir qrup səfirin ona baş çəkməsinə də icazə verilməyib. Mən Azərbaycan hakimiyyətini təkidlə beynəlxalq cəmiyyətlə dialoqa çağırıram”, deyə Yanqlandın bəyanatında bildirilir.

Bu, AŞ baş katibinin Məmmədovun həbsindən sonra onun işi ilə bağlı üçüncü bəyanatıdır. Bundan başqa, Yanqland iki dəfə Məmmədovun vəkilləri ilə telefonla danışıb.

Xatırladaq ki, Məmmədov Avropa Şurasının Bakı Siyasi Araşdırmalar Məktəbinin direktorudur. -06D-