ASALA: Biz Azərbaycan səfirliyini hədələməmişik

Yerevan/11.09.12/Turan-Armİnfo: ASALA erməni terror təşkilatı Azərbaycanın Budapeştdəki səfirliyinin əməkdaşlarının ünvanına hədə məktubu göndərmədiyini bəyan edib. Bu barədə ASALA-nın bəyanatında deyilir. Bəyanatı bu gün Ermənistan KİV-i dərc edib.

Bəyanatda qeyd olunur ki, təşkilatın heç zaman Azərbaycanla işi olmayıb və onun əsas missiyası Qərbi Ermənistanın (müasir Türkiyənin ərazisi) azad edilməsidir.

“Türkiyə tarix məhkəməsindən və milyonlarla günahsız erməninin məhv edilməsinə görə məsuliyyətdən qaça bilməz, o, məhv edilmiş xalqın sümükləri üzərində dövlət qura bilməz. Region xalqlarının oyanışı bu gün Ankaranın ekspansionist siyasətinə mane olur və şübhə yoxdur ki, erməni və kürd xalqları öz pozulmuş hüquqlarını bərpa etməli, tarixi torpaqlarını türk işğalçılarının pəncəsindən  xilas etməlidir”, - bəyanatda bildirilir.

Xatırladaq ki, sentyabrın əvvəlində Azərbaycanın Macarıstandakı səfirliyinə daxil olan elektron məktubda bütün diplomatlarla haqq-hesab çəkiləcəyi bildirilib. Bu, erməni zabiti qətlə yetirdiyinə görə həbs olunmuş azərbaycanlı zabit Ramil Səfərovun ekstradisiyasından sonra baş verib.

Qeyd edək ki, ASALA beynəlxalq birlik tərəfindən terror təşkilatı kimi tanınır və onun Ermənistanda mövcudluğu özlüyündə çox şeydən xəbər verir. -02D-