AŞPA məruzəçiləri tərəfləri danışıq masasına çağırır

Баку/07.07.17/Turan: Avropa Şurası Parlament Assambleyasının Azərbaycan və Ermənistan üzrə məruzəçiləri Füzuli rayonunun Alxanlı kəndində gərginliyin artmasından əndişələniblər.

Bu haqda AŞPA-nın məlumatında bildirilir.

Məlumatda vurğulanır ki, məruzəçilər iki yaşında körpə də daxil olmaqla, mülki şəxslərin həlak olmasından, yaralanmalarından narahatdırlar.

Ermənistan və Azərbaycan üzrə məruzəçilər Alan Meale (Birləşmiş Krallıq), Giuseppe Galati (Italiya), Stefan Schennach (Avstriya) və Cezar Preda (Rumıniya) münaqişə tərələrini atəşkəs rejiminə sayğı göstərməyə, danışıqlar masasına geri dönməyə çağırır, münaqişənin hərb yolu ilə həlli yolunun olmadığını vurgulayır.

Məruzəçilər insan tələfatına görə, başsağlıqlarını da ifadə ediblər.

Azərbaycanın Müdafiə Nazirliyinin məlumatına görə Ermənistan Silahlı Qüvvələri iyulun 4-də Füzuli rayonunun Alxanlı kəndini 82 və 120 millimetrlik minaatanlardan və dəzgahlı qumbaraatanlardan atəşə tutub.

Nəticədə iki dinc sakin həlak olub. Bunlar kənd sakinləri Sahibə Quliyeva və onun 2 yaşlı nəvəsi Zəhra Quliyevadır.

Qəlpə yarası alan Sərvinaz Quliyeva isə hərbi hospitala çatdırılaraq əməliyyat olunub.-0-