Ekspert: �Azərbaycan qazın qiymətində ciddi problemlərlə qarşılaşacaq�

Bakı/07.07.17/Turan: "Azərbaycan, ümumiyyətlə, Avropanın qaz bazarında öz qaz həcminə görə önəmli rol oynamır. Avropanın illik qaz istehlakı 500 milyard kubmetrdir. Azərbaycan isə ən yaxşı halda 2020-ci ildən sonra 10 milyard kubmetr qaz verə biləcək", - iqtisadçı Natiq Cəfərli ABŞ-ın Avropanın qaz bazarına ixracı artırmasının Azərbaycanın qaz təchizatçısı perspektivlərinə təsirilə bağlı şərhində deyib.

Ekspert əlavə edib ki, Avropa üçün Azərbaycanın bazara çıxaracağı qazın həcmi önəmli deyil: "Önəmli olan boru xətlərinin çəkilməsidir ki, həmin xətlərə gələcəkdə İzrail, İraq, İran, hətta Kiprin qoşulması ehtimalı var. Avropa ölkələri də boru xətlərinə bu səbəbdən önəm verirlər. Adıçəkilən ölkələr boru xətlərinə qoşulsalar 32-33 milyard kubmetrlik qaz həcmi yaranacaq".

N.Cəfərli ABŞ-ın Avropanın qaz bazarına girməsinin çox önəmli hadisə olduğunu vurğulayır.

Ekspert deyir ki, ABŞ rəsmilərinin son bəyanatlardan bəlli olur ki, yaxın illərdə Avropaya sıxılmış şəkildə 80 milyard kubmetrlik qaz ötürmək istəyirlər, bu, kifayət qədər böyük həcmdir və bu həcmin Avropa bazarına çıxarılması nəzərdə tutulan Azərbaycan qazının qiymətinə təsir göstərəcək: "Bunun Azərbaycana təsiri qiymətlə bağlı olacaq. Azərbaycan satdığı qazın qiymətində ciddi problemlərlə qarşılaşacaq. İndi Avropada qazın hər min kubmetr üçün ortalama qiyməti 230-240 dollardır. 2020-ci ildə isə bu qiymətlərin 200 dollara qədər enməsi ehtimalı var, yəni, əsas problem qiymətlə bağlı olacaq".

N.Cəfərliyə görə, Azərbaycanın bazara çıxaracağı qaz həcmindən 2 milyard dollarlıq vəsait gözlənilir: "Ancaq bu pul birbaşa Azərbaycana aid deyil. Azərbaycan 7 payçıdan biridir. Azərbaycanın payına düşən vəsaitin az olması isə ona gətirib çıxara bilər ki, yalnız aldığı kreditlərin faizlərini ödəməyə bəs edəcək qədər vəsait əldə edə bilər. Bu da əlbəttə ki, ölkə üçün yaxşı hal deyil".

Amerikanın Avropaya qaz tədarük etməsi Polşanın paytaxtı Varşavada keçirilən "Üç dəniz sammiti"ndə əsas mövzulardan biri olub. ABŞ prezidenti Donald Trump və Polşa prezidenti Andrzej Duda bəyan ediblər ki, yaxın zamanlarda tərəflər ABŞ-ın Polşaya maye qaz ixracına dair sazişlər imzalayacaqlar. D.Trump Varşavada Xorvatiya prezidenti Kolinda Grabar-Kitaroviclə də eyni məsələ ilə bağlı müzakirələr aparıb. Trump Varşavada ABŞ maye qazının qəbulu üçün nəzərdə tutulan terminalın mümkün qədər tez tikilməsinə çağırıb. ABŞ-dan gələcək təbii qazın ilk partiyasının artıq avqustda Klaypeda limanına daxil olacağı bildirilir. Hazırda Şərqi Avropa qazı əsasən "Gazprom"dan alır. Trump-ın təşəbbüsü Rusiya inhisarçısının mövqelərini ciddi zəiflədə bilər.-05B-