Avropa deputatlarının xoşagəlməz sualları İlham Əliyevi qəzəbləndirib

AŞPA üzvləri qarşısında çıxışını yekunlaşdıran İlham Əliyev yarım saat ərzində əksəriyyəti onun üçün xoşagəlməz olan sualları cavablandırıb.

Belə ki, Avropa deputatları onlarla siyasi məhbus, fəalların həbsi və sərbəst toplaşmaq azadlığının pozulması, onlarla jurnalistin həbsi və söz azadlığının pozulması haqqında soruşublar. Buna cavabda Əliyev bildirib ki, Azərbaycanda peşə fəaliyyətinə görə həbs edilmiş jurnalist yoxdur. “Bizdə 2003-cü ildən etibarən diffamasiyaya görə həbs edilmiş jurnalist yoxdur, sizdə olan məlumatlar yanlışdır”, deyə Əliyev iddia edib.

Sonuncu prezident seçkiləri zamanı saxtalaşdırmalar haqqında sual ümumiyyətlə Əliyevi qəzəbləndirib. Bu sualı verən Britaniyalı deputatı barmaqla hədələyən Əliyev onu yalanda ittiham edib. “Siz sualınızda iki yalan söylədiniz. Birincisi, bütün müşahidəçilər təsdiq ediblər ki, seçkilər azad və ədalətli olub. Ən əsası, seçkilər xalqın iradəsini əks etdirib, pozuntu və saxtakarlıqlar isə sizin ölkənizdə var”, deyə qıprıqmızı qızaran Əliyev bildirib.

Məşhur hüquq müdafiəçisi Leyla Yunusun təqibinin səbəbi haqqında suala cavabda Əliyev qeyd edib ki, “o, ondan müvafiq məlumat istəndikdə qaçmaq istəyib, bundan sonra onun barəsində müvafiq tədbirlər görülüb”.

Vətəndaş cəmiyyətinə və siyasi rəqiblərə qarşı təzyiqlərin səbəbləri haqqında suala cavabda Əliyev deyib ki, bu sualları verənlər tarixi bilmirlər. Azərbaycanda 1992-93-cü illərdə belə vəziyyət var idi. Bundan sonra stabillik dövrü yaranıb və indiyədək davam edir. “Bax yuxarıda oturan bu gənclər bunu xatırlamırlar” deyən Əliyev onun çıxışına etiraz edən siyasi mühacirlər qrupunu göstərib.

Maraqlıdır ki, Əliyev Avropa deputatlarının suallarını asanlıqla dəf edə bilib. O, deputatların tarixi pis bildiklərini deyərkən haqlı idi. Onların faktlara söykənməyən sualları ümumi xarakter daşıyırdı ki, bu da Əliyevə kontrarqumentlərdən öz xeyrinə istifadə etmək imkanı verib. -02В-