Avropa parlamenti öz qətnaməsində Azərbaycanda vətəndaş cəmiyyətinə və KİV-ə qarşı repressiyaları pisləyib

Dekabrın 19-da Avropa parlamenti hakimiyyətin vətəndaş cəmiyyətinə və KİV-ə qarşı repressiyalarını pisləyən qətnamə qəbul edib.

Sənədin preambulasında deyilir ki, 2023-cü ildən Azərbaycan hakimiyyəti vətəndaş cəmiyyətinə, siyasi müxalifətə, hüquq müdafiəçilərinə, LGBTİ+ icmasına və müstəqil mediaya qarşı sistemli repressiyalarla məşğuldur və bu, COP29 ətrafında güclənir. Azərbaycanda 300-dən çox siyasi məhbus və 23 erməni əsir var;

Siyasi məhbus, 2024-cü il Saxarov mükafatının finalçısı Qubad İbadoğlu isə ev dustaqlığında saxlanılır, halbuki, Avropa İnsan Hüquqları Məhkəməsi onun səhhətinin kritik olduğunu müəyyən edib, xəstəxanaya yerləşdirilməsini və təcili ürək əməliyyatının aparılmasını tələb edib;

Vətəndaş cəmiyyəti fəalı Anar Məmmədli 2024-cü ilin aprelindən saxta ittihamlarla ilkin həbsdədir, tibbi yardım göstərilmədiyi üçün onun səhhəti pisləşib;

2024-cü il dekabrın əvvəlində Azərbaycan hakimiyyəti “Meydan” TV-nin jurnalistləri Aynur Qənbərova, Aytac Əhmədova, Xəyalə Ağayeva, Natiq Cavadlı və Aysel Umudovanı,  jurnalistlər Ramin Cəbrayılzadə və Əhməd Muxtarı həbs edib;

Bakı Jurnalistika Məktəbinin direktor müavini Ülvi Tahirov, siyasi fəal Azər Qasımlı və hüquq müdafiəçisi Rüfət Səfərov da həbs ediliblər. Onlara qarşı siyasi motivli ittihamlar irəli sürülüb;

Ətraf mühit fəalı Kamran Məmmədli COP29-da mühafizəçilər tərəfindən hücuma məruz qalıb və ona səfər etmək qadağan edilib;

Yuxarıda göstərilənlərlə əlaqədar Avropa parlamenti:

1.Azərbaycan rejiminin insan hüquqlarını, o cümlədən ifadə, birləşmək və dinc toplaşmaq azadlıqlarının davamlı şəkildə pozmasını və cinayət mühakiməsi sistemindən siyasi motivli sui-istifadə etməsini qəti şəkildə pisləyir;

2. Azərbaycan hakimiyyətini bütün dissident qruplara qarşı repressiyaları dərhal dayandırmağa və qondarma, siyasi motivli ittihamlarla təqib edilən hüquq müdafiəçiləri, jurnalistlər, siyasi və digər fəalları qeyd-şərtsiz azad etməyə, və bütün ittihamları ləğv etməyə çağırır;

3. Hakimiyyət orqanlarından İbadoğluya qarşı səfər qadağasını dərhal aradan qaldırmağı, ona qarşı irəli sürülən bütün ittihamları qeyd-şərtsiz ləğv etməyi və xaricdə təcili müalicə almasına icazə verməyi tələb edir. İbadoğlunun Saxarov mükafatının təqdimetmə mərasimində iştirakına və ya uzaqdan əlaqə saxlamasına icazə verilməməsindən təəssüflənir;

4.Azərbaycanı qeyri-hökumət qruplarının və medianın qeydiyyatı və maliyyələşdirilməsi ilə bağlı qanunlarını Venesiya Komissiyasının tövsiyələrinə uyğunlaşdırmaqla müstəqil mediaya qoyulan yersiz məhdudiyyətləri aradan qaldırmağa çağırır, hakimiyyətdən “Meydan” TV, “Toplum” TV, “Abzas Media” və “Kanal13”ə qarşı repressiyalara son qoyulmasını tələb edir;

5. Avropa İttifaqının qlobal insan haqları sanksiya rejiminə uyğun olaraq, Fuad Ələsgərov, Vilayət Eyvazov və Əli Nağıyev də daxil olmaqla, ciddi insan hüquqları pozuntularına görə məsuliyyət daşıyan Azərbaycan rəsmilərinə qarşı sanksiyaların tətbiqinə çağırır;

6. Təkid edir ki, Avropa İttifaqı-Azərbaycan tərəfdaşlıq sazişində, o cümlədən enerji sahəsində - əsas hüquqlara hörmət və bütün siyasi məhbusların azad edilməsi şərti olmalıdır. Komissiyanı enerji sahəsində strateji tərəfdaşlığa dair 2022-ci il anlaşma memorandumunu dayandırmağa çağırır.

434 deputat qətnamənin lehinə, 30 nəfər əleyhinə səs verib, 89 deputat səsvermədə iştirak etməyib.