Avropa Şurası Nazirlər Komitəsi Azərbaycanın Avropa Məhkəməsinin qərarlarını icra etməsi məsələsinə baxacaq

Sentyabrın 17-də Avropa Şurası Nazirlər Komitəsi Azərbaycan da daxil olmaqla, Avropa Şurasına üzv dövlətlərin Avropa Məhkəməsinin qərarlarını necə icra etməsi məsələsinə baxmaq üçün rüblük görüşünə başlayır.

Ətraflı tədqiq ediləcək işlər arasında Azərbaycandan da işlər var. 

Xüsusən, Mahmudov və Ağazadənin işi (işlər qrupu) üzrə qərarlar 18.03.2009-cu ildə qüvvəyə minib, ifadə azadlığı hüququnun pozulması, böhtan haqqında qanunun əsassız tətbiqi ilə bağlıdır. 

Eyni zamanda, Məmmədlinin işi (işlər qrupu) üzrə qərarlar 19.07.2018-ci ildə qüvvəyə minib və ərizəçilərin seçkilərin monitorinqini apardıqlarına və ya aktiv ictimai və siyasi fəaliyyətlərinə görə saxlanılmasına və ilkin həbsinə (18 və 5-ci maddələrin pozuntusu) aiddir.

29 aprel 2024-cü il tarixində ilk iş üzrə ərizəçi, cənab Anar Məmmədli həbs olunub. Sonradan o, Azərbaycan CM-in 206.3.2-ci maddəsi ilə "bir qrup digər şəxslə birlikdə pul qaçaqmalçılığı" ittihamı ilə üç ay 28 gün müddətinə azadlıqdan məhrum edilib. Onun işi Abzas Media-nın jurnalistlərinin işi ilə birləşdirilib.

Nazirlər Komitəsi öz qərarlarını cümə günü, 20 sentyabr 2024-cü il tarixində dərc edəcək.