İranın qırmızı xətləri

Katarın Al-Jazeera kanalının İstanbuldakı ofisinin proqram müəllifi, beynəlxalq TV şərhçisi Yılmaz Akıncı, Əsəd ailəsi hakimiyyətinin devrilməsindən sonrakı proseslərə dair Turan İnformasiya Agentliyinin suallarını cavablandırdı.

ABŞ-ın 47-ci prezidentinin “Suriyada yeganə qalib olan Recep Tayyip Erdoğan güclü liderdir. Erdoğan ağıllı adamdır” - deməsinin səbəbini Suriyada təkcə bu gün deyil, 6 il əvvəldən cərəyan edən hadisələrdə axtarmaq lazımdır. Bəli, ABŞ vətəndaşını azad etmədiyinə görə, 2018-ci ilin iyun-iyul aylarında dalbadal X mesajları göndərərək Türkiyə iqtisadiyyatını alt-üst edən də Donald Trump idi, sentyabrda isə cihadçı qüvvələrin İdlibə yerləşərək orada idarə strukturu yaratmasında Türkiyənin himayəsini dəstəkləyən də.

Suriyada münaqişə yeni bir mərhələyə daxil olduqca, Türkiyə hərbi və kəşfiyyat əməliyyatları ilə nəticələri öz xeyrinə formalaşdıraraq bölgədə üstün gücə çevrilib. Ancaq Ankara indi kritik bir məqamla üz-üzədir: Artan iqtisadi təzyiq, geosiyasi mürəkkəblik və Suriyanın qeyri-müəyyən gələcəyi fonunda Türkiyə güclü rolunu nə qədər davam etdirə biləcək?

İnqilabları çox vaxt onların dağıdıcılıq qabiliyyətinə görə ölçən dünyada 2011-ci ilin ərəb baharı ilə başlayan Suriya yolu dəyişən ideologiyaların, geosiyasi manevrlərin və amansız insan itkilərinin salnaməsidir.