İsrail kəşfiyyatının Livanda Hizbullaha qarşı misli görünməmiş əməliyyatı, 3 min yaralı (Yenilənib)

Reuters mənbələrə istinadən xəbər verir ki, Mossad - İsrailin kəşfiyyat xidməti, Hizbullah tərəfindən sifariş edilən və Tayvanda istehsal edilən 5 min peycerə partlayıcı maddə yerləşdirə bilərdi.

Livanın təhlükəsizlik sistemindəki mənbənin sözlərinə görə, peycerlər Tayvanın Gold Apollo şirkəti tərəfindən istehsal edilib.

Lakin şirkət özü bu məlumatı təkzib edib və bildirib ki, qurğular onun brendindən istifadə hüququna malik olan Avropa şirkəti tərəfindən istehsal olunub.

Livandakı yüksək səviyyəli mənbə bildirib ki, sözügedən peycerlər AP924 modelidir: onlar mətn mesajlarını simsiz qəbul etmək və göstərmək qabiliyyətinə malikdirlər. Belə bir cihazdan telefon zəngləri edə bilməzsiniz.

Həmin mənbə deyib ki, peycerlər ilin əvvəlində Livana gətirilib.

Sentyabrın 17-də bütün Livanda peycerlər kütləvi şəkildə partladılar. Ölkənin Səhiyyə Nazirliyinin məlumatına görə, nəticədə 4 min nəfər xəsarət alıb, 11 nəfər ölüb.

 Əl-Hədəs telekanalının məlumatına görə, partlayışlar nəticəsində 500-ə yaxın Hizbullah üzvü görmə qabiliyyətini itirib.

Hizbullah baş verənlərə görə İsraili günahlandırdı və “ədalətli cavab” vəd etdi. İsrail rəsmiləri insidentlə bağlı rəsmi açıqlama verməyib. Axios mənbəyə istinadən yazıb ki, əməliyyat İsrail rəhbərliyinin son iclasında təsdiqlənib.

Sky News Arabia telekanalının məlumatına görə, peycerlər Mossad tərəfindən PETN (pentaeritritol tetranitrat) partlayıcı ilə doldurulub və batareyalar uzaqdan qızdırılan zaman partlayıb.

* * *

Hizbullah üzvlərinə məxsus peycerlər bu gün günortadan sonra kütləvi şəkildə partlamağa başlayıb. Livan Səhiyyə Nazirliyinin məlumatına görə, nəticədə 2,7 mindən çox insan xəsarət alıb. İsrail öz iştirakını təsdiqləməyib

Livanda peycerlərin partlaması nəticəsində biri uşaq olmaqla 8 nəfər həlak olub, daha 2750 nəfər yaralanıb. Nazırlık bildirirki, Beyrutda xəstəxanalar doludur və yaralıların əksəriyyəti əl və ya üz xəsarətləri ilə qəbul edilir.

Hizbullah sözçüsü Əl-Cəzirə telekanalına bildirib ki, peycerlərin kütləvi partlaması 3 nəfərin ölümünə və "çoxlu sayda" insanın yaralanmasına səbəb olub.

Telekanal qeyd edir ki, bir neçə ay əvvəl Hizbullah lideri Həsən Nəsrullah qrup üzvlərini smartfonlardan istifadəni dayandırmağa çağırıb. Onun sözlərinə görə, İsrail bu cihazları sındırmaq texnologiyasına malikdir.

Telekanalın müsahibə verdiyi hərbi analitiklərin sözlərinə görə, İsrailin mesajları ələ keçirməsinin qarşısını almaq üçün Hizbullah üzvləri kütləvi şəkildə peycerlərə keçməyə başlayıblar. Reuters mənbələrə istinadən yazır ki, bu gün partlayan qurğular son aylarda Hizbullah yaraqlıları tərəfindən əldə edilib.