Avropa Şurası Nazirlər Komitəsinin rəhbəri Azərbaycanla münasibətlərin bərpa olunacağına ümid edir

Yanvarın 27-də Avropa Şurası Nazirlər Komitəsinin hazırkı sədri,  Lüksemburqun xarici işlər naziri Ksavye Bettel Avropa Şurasının  fəaliyyət  planı çərçivəsində Azərbaycanla əməkdaşlığın bərpasından məmnunluğunu bildirib.

“Nazirlər Komitəsi Assambleyanın Azərbaycan nümayəndə heyətinin səlahiyyətlərini tanımamaq barədə qərarından sonra dayandırılmış Azərbaycan üzrə fəaliyyət planı çərçivəsində əməkdaşlığın bərpasını alqışlayır", - o, Avropa Şurası Parlament Assambleyasının Strasburq sessiyasında çıxış edərkən bildirib.

Assambleyanın Azərbaycan nümayəndə heyətinin etimadnaməsini ratifikasiya etməmək barədə

“Biz dialoq üçün platforma olaraq qalmalıyıq və ümid edirik ki, Assambleya və Azərbaycan parlament nümayəndə heyətləri tezliklə əlaqələrin bərpası üçün ümumi dil tapacaqlar”, -  Bettel əlavə edib.

Müzakirələr zamanı Ermənistandan olan deputat Armen Gevorkyan Bakıda erməni separatçıların məhkəmə prosesinə toxunub. O, məhkəmə prosesini "beynəlxalq hüququn pozulması, erməni xalqı üçün faciə və öz üzvünün təşkilatın əsas dəyərlərini pozmasına  məhəl qoymayan Avropa Şurası üçün rüsvayçılıq"adlandırıb.

Onun sözlərinə görə, “Bakıda hakimiyyət öz xalqını sivilizasiyadan təcrid edir, orta əsr despotik rejim qurur. Belə vəziyyətdə ermənilər üçün hansı ədalətdən danışmaq olar və Nazirlər Komitəsi bu biabırçı prosesi necə dayandıra bilər?"- Gevorkyan deyib.

Bettel cavab verib ki, Azərbaycanda saxlanılan və mühakimə olunan şəxslər  Avropa İnsan Hüquqları Konvensiyasının təmin etdiyi bütün hüquqlardan, o cümlədən ədalətli məhkəmə araşdırması hüququndan istifadə etməlidirlər.

“Əgər onlar  hüquqlarına riayət olunmadığını hesab edirlərsə, Avropa İnsan Hüquqları Məhkəməsinə müraciət edə bilərlər”, - o əlavə edib.

Xatırladaq ki, ötən il yanvarın 24-də Avropa Şurası Parlament Assambleyası ölkədə insan hüquqları ilə bağlı vəziyyətin kəskin pisləşməsi, Azərbaycanın öz öhdəliklərini yerinə yetirməməsi və təşkilatla əməkdaşlıqdan imtina etməsi səbəbindən Azərbaycan nümayəndə heyətinin səlahiyyətlərini təsdiq etməyib.

Prezident İlham əliyev bunu "antiazərbaycan addımı" adlandırıb,  Avropa Şurasından və onun strukturlarından çıxmaqla hədələyib.