Avropa Şurası Parlament Assambleyası: Azərbaycan casus proqramlarından sui-istifadə hallarını araşdırmalı olan beş ölkənin arasındadır

Strasburq/12.10.23/Turan: Avropa Şurasına üzv olan bir neçə ölkədə qanunsuz məqsədlərlə casus proqramlardan istifadə olunduğuna dair sübutlar var. Buna görə də Avropa Şurası Parlament Assambleyası həmin ölkələrin hökumətlərini onların bu cür proqramlardan istifadə etməsi  barədə məlumatları üç ay ərzində təqdim etməyə və sui-istifadə hallarını araşdırmağa çağırır. Bu barədə oktyabrın 11-də Strasburqda keçirilən sessiyada Avropa Şurası Parlament Assambleyasının qəbul etdiyi qətnamədə deyilir.

Turan-ın xüsusi müxbiri Strasburqdan xəbər verib ki, qətnaməyə “Pegasus” proqramından və gizli nəzarət üçün digər analoji proqramlardan istifadə edən ölkələr daxil edilib. Bunlar Polşa, Macarıstan, Yunanıstan, İspaniya və Azərbaycandır.

Qətnamədə Azərbaycanla bağlı deyilir ki, Bakı jurnalistlərə, müstəqil KİV sahiblərinə və vətəndaş cəmiyyəti fəallarına qarşı “Pegasus”dan istifadə edib.

Bundan əlavə, bildirilir ki, "son məlumatlar ondan Ermənistan-Azərbaycan münaqişəsilə əlaqədar istifadə olunduğunu (Ermənistanda çalışan 12 nəfərə, o cümlədən hökumət məmurlarına qarşı) göstərir".

Peter Omsiqtin (Niderland) hesabatına əsaslanan qətnamə digər üzv dövlətləri,   “Pegasus”u əldə edən və istifadə edən Almaniya, Belçika, Lüksemburq və Niderlandı ondan necə istifadə etdiklərini aydınlaşdırmağa və mövcud nəzarət mexanizmləri barədə  məlumatları 3 ay ərzində təqdim etməyə çağırıb.

Assambleya bildirib ki, siyasi opponentlərin, dövlət məmurlarının, jurnalistlərin, hüquq müdafiəçilərinin və vətəndaş cəmiyyətinin Avropa İnsan Hüquqları Konvensiyasında göstərilən məqsədlərdən başqa digər məqsədlərlə gizli izlənməsi Konvensiyanın pozulmasıdır. Həmçinin parlamentarilər Pegasus istehsalçısı olan İsraildən insan hüquqlarının pozulduğu ölkələrə proqramın ixrac edilməməsi üçün nə etdiyinə dair məlumat verməsini istəyiblər.

*18 iyul 2021-ci il tarixində Fransanın Forbidden stories qeyri-hökumət təşkilatı bildirib ki, bəzi ölkələrdə mobil telefonlara İsrailin NSO Group şirkətinin “Pegasus” proqramının quraşdırılması yoluyla siyasətçilər, jurnalistlər və vəkillər izlənilib. 1000-ə yaxın  abunəçinin izlənildiyi bildirilib. 16C06