AXCP aksiyasında saxlanılan bütün iştirakçılar biri istisna olmaqla azad edilib /YENİLƏNİB/ /YENİLƏNİB/

AXCP-nin Salyan rayon təşkilatının üzvü Rövşən Məmmədov istisna olmaqla, etiraz aksiyasında saxlanılanların hamısı azad edilmişdi.

*   *   *

2022 Noyabr 12 (Şəmbə) 10:44:16

Polis tərəfindən saxlanılan Azərbaycan Xalq Cəbhəsi Partiyası tərəfdarlarının sayı 204-ə çatıb /YENİLƏNİB/

Noyabrın 11-də Azərbaycan Xalq Cəbhəsi Partiyasının  aksiyası zamanı polis tərəfindən saxlanılanların  sayı 204 nəfərə çatıb. Partiyadan Turan agentliyinə bildiriblər ki, bu, saxlanılanların tam siyahısı deyil. Məlumat dəqiqləşdirilir.

*   *   *

2022 11 noyabr (cümə) 19:41:15

Azərbaycan Xalq Cəbhəsi Partiyasının fəalı polis maşınına ziyan vurmaqda ittiham olunur

Bakı/11.11.22/Turan: Daxili İşlər Nazirliyi müxalifətin etiraz aksiyası zamanı bir iştirakçının saxlandığını təsdiqləyib. O, polis maşınına ziyan vurmaqda ittiham olunur.

Daxili İşlər Nazirliyinin mətbuat xidmətindən Turan-a verilən məlumata görə, noyabrın 11-də saat 16:00-a yaxın bir qrup şəxs Bakı Şəhər İcra Hakimiyyətinin binası qarşısında razılaşdırılmamış aksiya keçirməyə cəhd edib.

Cəhdin qarşısı polis əməkdaşları tərəfindən alınıb və həmin şəxslər hadisə yerindən uzaqlaşdırılıb.

“Lakin aksiya iştirakçılarından biri, əvvəllər məhkum edilmiş R.Məmmədov sərxoş vəziyyətdə ikən polisin xidməti maşınının arxa şüşəsini sındırdığına görə polis bölməsinə aparılıb”, - mətbuat xidmətindən bildiriblər.

Hazırda müvafiq araşdırma aparılır, Daxili İşlər Nazirliyindən qeyd ediblər.

Öz növbəsində, “Müdafiə xətti” hüquq- müdafiə təşkilatının üzvü Zəfər Əhmədov Turan-a bildirib ki, saxlanılan şəxs Azərbaycan Xalq Cəbhəsi Partiyasının Salyan rayon təşkilatının üzvü Rövşən Məmmədovdur.

Eyni zamanda aksiyanın monitorinqini aparan hüquq müdafiəçisi qeyd edib ki, Məmmədovun aksiyada iştirakına və saxlanmasına dair videogörüntü var və kadrlardan görünür ki, o, avtomobilin şüşəsini sındırmayıb.

Əhmədov onu da qeyd edib ki, hüquq müdafiəçiləri noyabrın 11-i axşam saatlarında  saxlanılan 139 nəfərin buraxılması barədə məlumat əldə ediblər.—06B-