AXCP fəalı həbsdə aclıq elan edib

Narkotik ittihamı ilə üç il müddətinə azadlıqdan məhrum edilmiş Azərbaycan Xalq Cəbhəsi Partiyasının (AXCP) fəalı Elnur Həsənov dekabrın 3-dən aclığa başlayıb.

AXCP-dən Turan-a verilən məlumata görə, Həsənov cəzaçəkmə müəssisəsinə köçürülməməsinə və ona yaxınları ilə görüş verilməməsinə etiraz edir.

Avqustun 2-də onun barəsində hökm verilib, bundan sonra o, Umbakı qəsəbəsində yerləşən penitensiar kompleksin təcridxanasına köçürülüb. Sentyabrın 25-də Bakı Apellyasiya Məhkəməsi qərarı qüvvədə saxlasa da, o, hələ də cəzaçəkmə müəssisəsinə köçürülməyib.

Sonuncu dəfə normal görüşdə iyunun 21-də olub. Ondan sonra yanına gələn adamlarla yalnız şüşə arakəsmə arxasından ünsiyyətdə olub.

Umbakı kompleksinin rəhbərliyi məhdudiyyətin Penitensiar Xidmət tərəfindən tətbiq edildiyini bildirir.

Lakin bu qurumdan şərjh almaq mümkün olmayıb.

* Elnur Həsənov 28 noyabr 2023-cü il tarixində narkotik vasitələrin qanunsuz dövriyyəsi ittihamı ilə saxlanılıb (CM-in 234.4.3-cü maddəsi). Fəal hesab edir ki, həbsinin əsl səbəbi Yol Polisi İdarəsinin rəhbərliyinin hərəkətlərini tənqid etməsidir.