AXCP fəalı karserə salınıb

Kürdəxanıda 1 saylı təcridxanada saxlanılan AXCP Gənclər Komitəsinin üzvü Elvin Abdullayev karserə salınıb. Bu barədə Turan-a fəalın anası Zülfiyyə Abdullayeva bildirib.

Onun sözlərinə görə, buna mayın 5-də Bakı Ağır Cinayətlər Məhkəməsində hazırlıq iclası zamanı E.Abdullayevin arxasını hakimə çevirməsi səbəb olub.

“O, Azərbaycanın məhkəmə sisteminin hakimiyyətin alətinə çevrilməsinə, günahsız insanların barəsində ağır hökmlərin çıxarılmasına etiraz olaraq arxasını hakimə çevirib”, - ana qeyd edib.

Hakimin xəbərdarlığına baxmayaraq, gənc özünü düzəltməyib. Bu səbəbdən hazırlıq iclası mayın 14-nə keçirilib.

E.Abdullayev Azərbaycan Pedaqoji Universitetinin tələbəsidir. Tələbələr arasında hakimiyyəti tənqid etdikdən sonra prorektor onu çağıraraq bunun yolverilməz olduğunu bildirib.

2015-ci il yanvarın 8-də imtahan verdikdən sonra o saxlanılıb və üzərindən guya 3 qr. heroin götürülüb.

E.Abdullayevə qarşı 234.4.3-cü maddə (iri həcmdə narkotik maddənin qanunsuz dövriyyəsi) ilə cinayət işi açılıb.

Lakin tələbə bildirib ki, narkotik maddəni onun üzərinə qəsdən qoyublar. O, ittihamı siyasi sifariş hesab edir.

Ananın sözlərnə görə, oğlunun psixi problemləri var və ibtidai istintaq zamanı təzyiqlərə məruz qalıb.

“Oğlum xəstədir. O, uzun müddət müalicə olunub. Təcridxanada dindirmə zamanı müstəntiqlər onu və partiya liderlərini təhqir ediblər. Tez-tez onu müxtəlif kameralara keçirirlər, müxalifətyönlü qəzetləri vermirlər”, - Z.Abdullayeva bildirib.

Mayın 8-də təcridxanada anadan bağlama qəbul etməyiblər. “Ərzaqları götürmədilər. Dedilər ki, mayın 7-dən Elvin karserə salınıb, mayın 15-də çıxacaq. Səbəbini açıqlamadılar”, - ana vurğulayıb.

Fəalın vəkili Əli Mehdiyev də gəncin hansı səbəbdən karserə salındığını bilmir. Bu barədə anadan öyrənib və cəzanın səbəblərini araşdırmağa çalışır.

Vəkil qeyd edib ki, məhkəmədə fəalın hərəkətləri E.Abdullayevn cəzalandırılması üçün səbəb ola bilməz. -03B-