AXCP fəalı polis bölməsində pis rəftardan şikayət edib

Xalq Cəbhəsi Partiyasının inzibati qaydada 10 gün müddətinə həbs edilmiş fəalı Ceyhun Novruzov polis bölməsində pis rəftardan şikayət edib. Bu barədə Turan-a bu gün inzibati qadada həbs olunanların saxlanma məntəqəsində Novruzovla görüşən vəkil Nemət Kərimli bildirib.

Novruzov vəkilə deyib ki, dekabrın 13-də saxlanıldıqdan sonra onu Səbail Rayon Polis İdarəsinin 8-ci polis bölməsinə gətiriblər və bütün gecə soyuq beton döşəmədə ac-susuz saxlayıblar.

Novruzov həbsini siyasi fəaliyyəti ilə əlaqələndirib.

Vəkilin sözlərinə görə, polis 10 günlük həbsi "yüngül cəza" hesab edib və şikayət verib. Lakin dekabrın 19-da Bakı Apellyasiya Məhkəməsi şikayəti təmin etməyib, deyə vəkil qeyd edib.

AXCP-dən bildiriblər ki, partiyanın Səbail Rayon Təşkilatının sədri Ceyhun Novruzov dekabrın 13-də taksi sürücülərinin əsassız cərimələnməsinə etiraz etdiyinə görə saxlanılıb. O, polisə tabe olmamaqda ittiham olunub.

Dekabrın 14-də Səbail Rayon Məhkəməsi onu 10 gün müddətinə həbs edib.