AXCP sədrinin müavini istefa verib

AXCP sədrinin müavini Əbülfəz Qurbanlı partiyadan istefa verib. Bu barədə o Facebook səhifəsində məlumat yayıb və KİV-lərə istefasını telefonla təsdiqləyib. Amma, istefasının səbəbləri barədə məlumat verməyib.

Əbülfəz Qurbanlı Facebook səhifəsində istefası barədə bunları yazıb:

“Dostlar, dərin bağlı olduğum AXCP-dən istefa verirəm. Düz yolda olmuşam, dəyərlər uğrunda savaşmışam, bundan sonra da düz bildiyim yolda olacam. Var gücümlə sıralarımızın genişlənməsi, gənclərin AXCP-də təşkilatlanması, genişlənməsi- ali məqsəd üçün çalışmışam. İndi isə istefa verirəm, çünki bacardıqlarımı gerçəkləşdirməyə əngəllər var. Bundan sonra davam edənlərə uğur arzu edirəm. Bu addımımdan məyus olanlar, ümid verdiyim hər kəs, gənc dostlarım, məhbəsdəki dostlarım- haqqı üçün savaşdığım xalqımız məni bağışlasın”, o qeyd edib.

Əbülfəz Qurbanlı Turanın müxbirinin telefon zənginə bir anlıq cavab verib, istefasını təsdiq edib və səbəbi barədə danışmayıb. Bundan sonra telefonu yenidən söndürülüb.

Öz növbəsində, AXCP Əbülfəz Qurbanlının istefa barədə yazdıqlarını qəbul edir, amma istefanın səbələri barədə məlumatlı deyil. -03B-