Azərbaycan elektron viza tətbiq edir

Ötən gün Azərbaycan prezidenti ölkəyə gələn əcnəbilərə və vətəndaşlığı olmayan şəxslərə vizanın rəsmiləşdirilməsi üzrə təxirəsalınmaz tədbirlər haqqında sərəncam imzalayıb. 

Nazirlər Kabinetinə tapşırılıb ki, 10 gün müddətində “Giriş-çıxış və qeydiyyat”  avtomatlaşdırılmış məlumat-axtarış sistemindən əcnəbilərə və vətəndaşlığı olmayan şəxslərə viza rəsmiləşdirilməsi zamanı əl-barmaq izlərinin alınmasını nəzərdə tutan müddəalar çıxarılsın.

XİN-ə tapşırılıb ki, prezidentin 2011-ci il 20 aprel fərmanından irəli gələn əvvəlki tapşırıqların icrasını təmin etsin. Bundan əlavə, XİN-ə tapşırılıb ki, ölkəyə gələn turistlərə elektron vizaların verilməsi üçün elektron ərizə formasının, tələb olunan digər sənədlərin siyahısının, habelə viza rəsmiləşdirilməsi ilə əlaqədar zəruri məlumatların 10 gün müddətində Azərbaycanın xarici ölkələrdəki bütün səfirlikləri və konsulluqlarının İnternet- informasiya ehtiyatlarında yerləşdirilməsini təmin etsin.

Azərbaycanın xarici ölkələrdəki səfirlikləri və konsulluqlarının viza rəsmiləşdirilməsi ilə bilavasitə məşğul olan əməkdaşları üçün elektron vizaların verilməsi ilə bağlı treninqlərin keçirilməsi nəzərdə tutulur.

XİN və MTN-ə tapşırılıb ki, Azərbaycanın xarici ölkələrdəki səfirlikləri və konsulluqları tərəfindən turistlərə elektron vizaların verilməsi işini qısa müddət ərzində təşkil etsinlər.

Prezident Administrasiyasına bu sərəncamın icrasına ciddi nəzarətin  həyata keçirilməsi tapşırlıb.

* Elektron viza  vizaların verilməsində yeni texnologiyadır. Mahiyyəti ölkənin miqrasiya xidmətinə və konsulluğuna elektron formada ərizələrin əvvəlcədən verilməsindən və sonradan sərhəd xidmətlərinin məlumat bazasında qeydiyyata alınmasından ibarətdir. Bu texnologiya ilk dəfə Avstraliyada tətbiq olunub.—06D-