Azərbaycan, Ermənistan XİN rəhbərlərinin və ATƏT-in Minsk Qrupu həmsədrlərinin birgə bəyanatı

Vyana/22.04.20/Turan: Azərbaycan və Ermənistanın  XİN rəhbərləri, ATƏT-in Minsk Qrupunun həmsədrləri aprelin 21-də keçirilmiş birgə videokonfransın yekunları ilə bağlı bəyanat qəbul ediblər. Bəyanatda deyilir ki, məsləhətləşmələr zamanı iştirakçılar Qarabağ münaqişəsinin nizamlanması prosesində növbəti addımları nəzərdən keçiriblər.

“Etiraf edilib ki, COVİD-19 pandemiyası nəticəsində yaranmış fövqəladə vəziyyətə görə əvvəllər razılaşdırılmış humanitar tədbirlərin həyata keçirilməsi təxirə salınıb. Nazirlər səviyyəsində şəxsi görüşlər və həmsədrlərin Cenevrədə razılaşdırılmış regiona səfərləri də təxirə salınıb. Buna baxmayaraq, həmin tədbirlərin hazırlanması üzrə lazımi işlər davam etdirilir.

Həmsədrlər atəşkəsə ciddi əməl olunmasının, hazırkı şəraitdə təxribatçı hərəkətlərdən çəkinməyin vacibliyini vurğulayıblar və tərəfləri gərginliyin azaldılması üçün tədbirlər görməyə çağırıblar.

Onlar həmçinin hazırkı şəraitdə ATƏT-in fəaliyyətdə olan sədrinin şəxsi nümayəndəsinin davam edən işinə görə minnətdarlıqlarını bildiriblər və monitorinqin tezliklə bərpa edilməsinin zəruriliyini vurğulayıblar", - bəyanatda bildirilir.

XİN rəhbərləri və ATƏT-in Minsk Qrupunun həmsədrləri sıx əlaqə saxlamaq və şəxsən danışıqları mümkün qədər tez bir zamanda davam etdirmək barədə razılığa gəliblər.-02D-