Azərbaycan hakimiyyəti Qarabağ müxalifətə hücum edir

Azərbaycan hakimiyyəti Qarabağ münaqişəsi zonasında son hərbi əməliyyatları bəhanə edib müxalifətə divan tutmağa cəhd edir.

Xalq Cəbhəsi Partiyasının sədri Əli Kərimli növbəti dəfə hücum obyekti seçilib.

Bir qrup gənc onun evi önündə milli satqınlıq haqda bəyanatlar yazılmış plakatlarla piket keçirib. Plakatların birində belə yazılıb:  «Əli Kərimli, sənin oğlun İngiltərədədir, bizimkilər isə Qarabağda».

Maraqlıdır ki, yığışanlar yüksək rütbəli məmurların xarcdə yaşayan və heç vaxt ön cəbhədə görünməyən övladları barədə heç nə deməyiblər.

Əli Kərimli etiraz aksiyaları ilə bağlı düşüncələrini özünün facebook səhifəsində bölüşüb. 

“2 apreldə ermənilərin atəşkəsi pozmasını eşidən kimi statusumda belə yazdım: “Bu gərgin məqamlarda bütün varlığımızla ordumuzun yanında olduğumuzu bəyan edirəm” - deyən Ə.Kərimli cəbhə xəttində gərginlik zamanı bölüşdüyü fikirlərinin hamısının orduya dəstək məzmunda olduğunu ifadə edib.

“İndi bunlar qəhrəman ordumuzun zəfər yürüşünü dayandırıb, bir saatdan bir mənim evimin qarşısında aksiyalar keçirirlər. Evimizin qarşısında rejimin göndərdiyi dəstə qışqırır ki, “Qarabağ bizimdir, bizim olacaq!”. Adamdan soruşarlar ki, ordumuza “dur!” əmrini mənmi vermişəm, yoxsa sizin lideriniz İlham Əliyev? Ölkəmizi düşmən erməninin dostu, himayədarı Rusiya asılılığına aparan mənəm, yoxsa, İlham Əliyev? Bu xalqdan oğurlanıb, Panamada ofşor hesablarda gizlədilən milyardlar da bəlkə, İlham Əliyevin yox, mənimdir?...” - deyə partiya lideri vurğulayıb.—0—