Azərbaycan hökuməti Avropa məhkəməsinin qərarları üzrə kompensasiyaları ödəməkdən imtina edir

Keçmiş siyasi məhbus və hüquq müdafiəçisi Rəsul Cəfərov Avropa İnsan Hüquqları Məhkəməsinin qərarı ilə Azərbaycan hökumətinin ona ödəməli oıduğu kompensasiyanı ala bilmir.

Söhbət R.Cəfərovun qanunsuz həbsi və hüquqlarının pozulmasına görə hökumətin ona ödəməli olduğu 32,5 min avrodan gedir.

R.Cəfərov Facebook səhifəsində yazıb ki, hakimiyyət kompensasiyanın verilməsinin yubadılmasının səbəbləri ilə bağlı sorğusuna cavab vermir.

R.Cəfərov 11 ay öncə azadlığa buraxılsa da bank hesabı üzərindəki həbs hələ də qalır.  Baş Prokurorluq bu məsələ ilə əlaqədar müraciətlərinə cavab verməyib. Odur ki, hüquq müdafiəçisi məhkəməyə müraciət etmək niyyətindədir.

R.Cəfərov ölkəyə giriş-çıxış zamanı hüquqlarının pozulmasına görə   Dövlət Sərhəd Xidməti və Dövlət Gömrük Komitəsini də məhkəməyə verib.

Öz növbəsində Avropa məhkəməsi Azərbaycan Ədliyyə Nazirliyinin onun rəhbərlik etdiyi QHT-nin - İnsan Haqları Klubunun qeydiyyatından imtina etməsilə bağlı qərar çıxarmalıdır.

R. Cəfərov 2014-cü il avqustun 2-də həbs olunub. Mənimsəmə, qanunsuz sahibkarlıq, vergidən yayınma kimi əməllərdə suçlanan hüquq müdafiəçisinə Bakı Ağır Cinayətlər Məhkəməsi 6 il 6 ay həbs cəzası kəsib. Hökmdə müəyyən edilən vergini ödədiyinə görə sonradan Bakı Apellyasiya Məhkəməsi bu cəzanı 3 ay azaldıb.

Beynəlxalq təşkilatların “vicdan məhbusu” elan etdiyi R. Cəfərov 2016-cı il martın 17-də əfv sərəncamı ilə azadlığa buraxılıb.

Qeyd edək ki,   2016-cı ilin yazında azadlığa buraxılan siyasi məhbusların demək olar ki, hamısı analoji problemlərlə üzləşib. Bundan əlavə, Avropa məhkəməsində Azərbaycan vətəndaşlarının hüquqlarını müdafiə edən və işi qazanan vəkillər də Avropa məhkəməsinin kompensasiyasını ala bilmirlər.-16D-